Dr. Stella van Rijn rector magnificus di UoC ta splika
WILLEMSTAD.- Di 24 pa 28 di mart ta Green Week organisá pa University òf Curacao dr. Moises da Costa Gomez. Ta trata di un siman ku diferente presentashon, interkambio i diskushonnan pa trese e konsientisashon pa kambionan duradero. Komo invitado na e siman ta prof. Jan Rotmans ku huntu ku diferente lider i gruponan di interes den komunidat i tambe ku presensia di tur hende ku ke presensia e interkambionan, ta trese un siman bèrdè.
Dr. Stella van Rijn rector magnificus di UoC den entrevista ku EXTRA, ta konta kon e siman lo bai ta hinka den otro.
Ta pa promé bia ku UoC ta organisá e Green Week. E green week manera Stella van Rijn a splika, ta un punto di kuminsamentu (Start punt) pa UoC haña e ròl di katalisadó di desaroyo duradero. El a menshoná e katalisadó pasobra no ta na nan pa organisá e desaroyo duradero, pero nan a ripara ku tin hopi aktividat kaba den komunidat pero hopi no sa di otro. Tambe nan a ripará ku no tur organisashon ta konsiente ku e époka di hasi negoshi manera kustumber a pasa.
“Nos ta biba den un era di transishon i e transishon ei tei kaba i ta bai bira mas intenso. Komo UoC nos ta mira e ròl di konsientisá i sòru pa nan no bira menasa pero pa nan ta oportunidat. Esei ta e kuadro den e tema di salubridat planetario ku no ta regardá nos planeta pero mas bien pa nos hende”, segun sra van Rijn.
E filosofia ei ta e base pa e metanan pa desaroyo sostenibel ku Nashonnan Uní ta papia di dje pero ta bisa ku e ser humano su impakto riba planeta ta asina grandi den último 200 aña ku e ta forma un disturbio pa hopi sistema ekológiko. Entre otro e forma ku nos ta usa nos awa, e manera ku ta produsí i konsumí kuminda, tur e kosnan ei un impakto hopi grandi riba nos salubridat. E Co2 nos ta sintié den nos salubridat komo hende. I no ta pòrnada ku e konsepto ei ta originá di WHO.
E planeta a eksperensia hopi kos manera meteornan ku ta kai, eis ku ta dirti pero e planeta tei te ainda. E ser humano sinembargo tin di tene kuido pasobra e ta reflehá den kantidat di hende ku awendia tin problema di kurason, problema diabétiko, vírùsnan manera Covid ets ets i nos mester ta konsiente ku ta nos ta kous’e. I kon ta kambi’e.
P’esei e Green Week pa lanta e konsientisashon i pa hende por komprondé ku “it’s not business as usual” pero ban prepará pa un mundu mas duradero den e kaso aki nos isla mas duradero. Nos tin solamente 444 kilometer kuadra i no tin mas espasio i nos mester biba riba e isla i p’esei mester sòru us’é na un manera sabí pa nos yunan i ñetunan tin e mesun kalidat di bida ku nos tin.
PROGRAMA
Segun Stella van Rijn den e siman aki nan a enfoká riba algun grupo i sektor spesífiko por ehèmpel djaluna tabatin un green tour den un bùs chikí ku studiante i prof. Jan Rotmans ku ta un eksperto riba su pensamentu riba transishon i ki efekto esaki tin. Tabatin kompanianan representá i tambe gobièrnu ku a bishitá diferente kaminda ku ta okupá na un manera duradero.
Djamars a sigui sekshon na Banko Sentral kaminda a diskutí tokante desaroyo di proyekto, desaroyo di “vastgoed” i invershonnan pa proyektonan duradero. Esei tin su impakto riba nos espasio, uso di tereno i kon ta invertí i finansiá proyektonan duradero ku tin riesgo mas haltu ku otro invershonnan.
Awe djárason na UoC tin un dia kompleto kaminda lo diskutí tokante e kambionan den enseñansa. Kua sistema di enseñansa lo fasilitá pa e hende di futuro. Tin un forma di pensa duradero i kiko e ta rekerí. E manera di sinta den klas awendia lo mester bira mas interaktivo i ku fuentenan digital i traha ku sektornan. Lo pone hopi atenshon na habilidatnan pa yuda hende prepará bon. Mas aleu l tin e transishon di ekonomia i riba e dia ei a generá hopi grupo, hende individual i organisashonnan kui ta okupá pa kaba na un forma duradero i a invitá sektor di turismo. A invitá sektor di turismo pa splika nan aserkamentu pa ku turismo duradero.
I djabièrnè ta e ‘Masterclass’ kaminda profeshonnan na nivel di CEO lo papia ku Rotmans i kon por kambia e pensamentu di un menasa pa oportunidatnan. Ta un siman yen pero ta djis un kuminsamentu.
