WILLEMSTAD.- Ku sumo plaser Gregory Colina ke anunsiá ku su buki i método di piano latino titulá, “A Guide to Latin Piano [email protected] Volume1”, ta kla i a bai imprenta.

E buki lo retorná desèmber próksimo i lo ta riba merkado na benta den desèmber mes.

Den e buki Gregory lo trata, kon lo toka diferente estilo di Merengue riba piano, i kon tin ku prepará bo man i dedenan pa esaki, mesun kos lo presentá kon ta toka diferente estilo di Salsa, Montuno, Descarga i Timba.

Tambe un parti pa prepará bo dedenan pa por toka e estilonan aki. E lo pasa un rekorido di diferente maestronan latino i nan estilo.

E “highlight” di e buki lo ta, kon ta toka nos Tumba i su historia pero tambe e desaroyo di Tumba. Tambe lo trata notashon di tumba den transkurso di 2 siglo i muchu mas. Den e buki tin algun pianista lokal komo invitado i lo mustra tambe kon nan ta desplegá é estilo di Tumba. Ta trata aki di Maestro David Ronchi Matthew i Renato Nato Mingeli. Maestro Robert JeanD’or di hermana isla Aruba, tambe lo ta parti di e buki aki pa su areglo di ‘Patacón Pisao’, un merengue di e konosido Johnny Ventura q.e.p.d.

Adishonal mester bisa ku é buki lo ta kompañá pa grabashonnan digital ku lo duna instrukshon mas detayá di e estilonan i kon pa toka Piano Latino.

E buki ta wòrdu saká pa Musici-Muziek-Si i ta hasi uso di un imprenta lokal pa esaki. E diseño gráfiko bunita di e buki a keda trahá pa sra. Charitza de Meza.

Esaki lo ta é promé edishon i lo spera ku e di dos edishon lo sali denter di dos aña. Den e di dos lo bai mas profundo riba ritmonan lokal i nan konekshon ku Afrika.

Mester bisa ku ta planiando un charla i un resèpsi di gala pa presentá e buki i su kontenido di un forma úniko. Pues bo tin ku prepará bo bistí di gala pa e evento aki pa desèmber próksimo. Keda pendiente!

 

LAGA UN KOMENTARIO

Please enter your comment!
Please enter your name here