Gregory Colina: ‘Na Kòrsou nos ta muchu chikí pa e kos aki’

... Gregory Colina...

WILLEMSTAD.- ‘DEN E BEMBE’ a kombersá ku Gregory Colina, konosido kompositor i areglista lokal riba e intenshon di DUCAPRO pa kuminsá kobra radio emisoranan i plantanan di televishon lokal 3 mil florin pa ‘royalties’ pa luna.
‘Mi tin algun kansion inskribí na Buma/ Stemra, pero ta algun aña atras mi a hasi esaki debí ku mi mester a bai toka afó i tabatin ‘royalties’ embolbí. E loke bo ta haña di ‘royalties’ ta masha chikí mes. Despues di esei mi no a inskribí mas kansion. Ami ta usa un otro sistema pa mi registrá tur mi komposishonnan.
E manera ku ke introdusí e pago pa ‘royalties’ ta komo si fuera ku ta un penalidat bo ke introdusí pa radio i televishon lokal.
Fo’i 1913 tin un lei ku ta regla derechi di outor, pero esaki nunka a keda implementá. Nos ta un merkado asina chikí ku nos pueblo básikamente no ta paga pa tur e kosnan ei.
Ta masha hopi biaha bo mester hasi uso di un piesa pa luna, pa e por logra masha hopi hits pa e por bira algu signifikante serka nos.
Na Kòrsou nos ta muchu chikí i bo por bisa pa kua teritorio bo produkshon ta liber i pa kua mester paga. E no ta funshoná den un pais chikí. Pa nos aki e no ta bai deha nada, e ta bai trese mas frustrashon pa nos músikonan.
Sigur ku mi eksperensia ku mi tin na BUMA/STEMRA, ta kuantu e piesa ta bai wòrdu di ‘air’? Ora bo wak e nulnan i ku ta 1 ‘duizenste’ cent bo ta bai kobra. Den un pais grandi ku ‘million hits’, e ora ei bo ta bai mira e sèn.
Radio emisoranan lokal ta ‘free to air’, e spònser ta paga e radio pa e eksistí. No ta manera den paisnan grandi kaminda bo ta paga abono pa skucha radio via di kabel.
No tin lógika, kon e social media ta bai paga esaki, un hende ta pone algu riba facebook i e ta haña ‘million hits’, pero ta grátis, e ta otro for di ‘Spotify’ i sobra kompanianan kaminda si bo ta paga pa skucha nan repertorio’.

SHARE

LEAVE A REPLY