...E lider dje partido Naleraq di Groenland, Pete Broberg (r), e kandidato Juno Berthelsen (3-d) i otro miembronan dje partido ta selebrá resultado di elekshon di 11di mart último…
NUUK, Dinamarka (AFP).- Partidonan polítiko di Groenland, teritorio outónomo danes, ayera a denunsia di manera unánime ”komportashon inaseptabel” dje presidente di Merka, Donald Trump, kende a ripití di ke aneksá e isla ártiko.
“Nos -tur e hefenan di partido- no por aseptá e deklarashonnan ku vários biaha ta ripití relashoná ku kontrol di Groenland di parti di Merka”, segun e lidernan dje sinku partidonan representá den Parlamento grunlandes.
“Nos ta konsiderá e komportashon ei inaseptabel pa ku amigunan aliado den un aliansa di defensa”, segun nana bisa den deklarashon konhunto.
Trump, puntrá djaweps último riba su intenshon pa hasi Groenland parti di Merka, a kontestá: “Mi ta kere ku esei lo tuma lugá”.
E sekretario general di OTAN, Mark Rutte ku tabata sintá band’i dje, no ker a duna komentario.
Despues di e deklarashonnan aki, e promé minister saliente Mute Egede a anunsiá ku lo konvoká “mas lihé posibel” tur e lidernan di tur formashon polítiko pa duna un reakshon konhunto.
E menasanan di Trump pa poderá” dje isla, riku na rekursonan natural, a sende alarmanan konsiderando ku den pasado el a nenga na deskartá e uso di forsa pa “konkistá Groenland”.
Algun dia pasá Groenland tabatin elekshon. Tur e partidonan polítiko i e mayoria dje 57.000 abitantenan dje isla ta apoyá e idea di independensia pero ta kontra integrashon den Merka.
