QUETTA, PAKISTAN (AP).- Vários individuo armá ku tabata pasa riba motosaikel a tira ayera kontra un restorant den un kaminda na sùitwèst di Pakistan, kaminda nan a kousa 18 morto, asina outoridatnan a bisa.
Na nortwèst, vários avion teledirigí merikano a lansa un atake den kua 12 supuesto rebelde a muri serka di e frontera afgano.
E personanan ku a pèrdè nan bida den e atake kontra e restorant, den e pueblo Turbat, den provinsia Baluchistan, tabata pakistaninan ku tabata biaha pa Europa ku trafikantenan i ku lo a krusa Iran, pais bisiña, asina Abdul Razzaq, funshonario den e zona, a bisa. Tambe dos persona a resultá heridá, el a agregá.
Kousa di e atake no ta konosí. Baluchistan ta esenario frekuente di aktonan di violensia di rebeldenan islamista i nashonalistanan ku ta eksigí un partisipashon mas grandi di e rekursonan natural di e provinsia.
Outoridatnan merikano masha poko ta hasi deklarashonnan públiko riba e operashonnan sekreto ku avionnan teledirigí ku CIA ta realisá na Pakistan.