WILLEMSTAD.- Durante di un tremendo selebrashon di dia di Pais Kòrsou, Grupo di Karnaval ViseVèrsa a revelá su trahe pa loke ta trata Karnaval 2024. Naturalmente henter e selebrashon aki a tuma lugá huntu ku e agrupashon musikal di kas di ViseVèrsa kual ta Gentz.
Karnaval!
Konosí pa ta un temporada festivo úniko ku ta trese karnavalistanan huntu pa kombibí positivamente den union i eksperensiá e máksimo nivel di goso i alegria.
Un temporada ku un i tur ta aportá i kultivá e esensia karnavalesko, pa garantisá ku E fiesta por sigui desaroyá. P’esei, durante karnaval 2024, Grupo di Karnaval ViseVèrsa ta duna honor na kada un persona ku ta duna nan granito pa ekselá nos dushi Karnaval.
Mirror Meraki
Meraki: ‘When you leave a piece of yourself. Your soul, creativity and love in what you do’.
Grupo di Karnaval ViseVèrsa ya pa mas ku 15 aña ta kontribuyendo ku alma i kurason na nos Karnaval di Kòrsou. No opstante kua opstákulo ku presentá, semper ViseVèrsa a keda perseverante, aplikando kreatividat, dedikashon, amor den kada kreashon.
‘Mirror Meraki’ ta e refleho di e Karnaval ideal!
Riba trahenan di ViseVèrsa pa karnaval 2024, por atmirá spilnan kibrá, kombiná ku kolónan yamativo ku ta realsá i komplementá e totalidat visual. Kada spil kibrá ta simbolisá tur e granito i esfuersonan ku ta ser hasí pa tur persona embolbí, engrandesé i mantené nos karnaval bibu i fuerte.
Ban apresiá kada un di e spilnan aki! E trabou duru, e dianan di kansansio i e anochinan sin drumi ku nos ta invertí pa E selebrashon ta un selebrashon tur afó.
Bo ta kla p’e? Felis Karnaval 2024!
