E rèper Bob Vylan kargá pa públiko. El a hasi yamada pa respondé koro pidiendo morto pa forsanan armá israelí.
LONDRES (AFP).- Gobièrnu britániko a kondená e presentashon di un duo di rèp, Bob Vylan, kende a interpretá un kansion den kua a motivá e públiko pa kanta den koro pidiendo morto di ehérsito israelí. Esei a tuma lugá durante dje festival di Glastonburry.
“No tin ekskusa pa e tipo di kanto asina espantoso di odio”, segun e promé minister laborista Keir Starmer.
“M’a bisa kaba ku Kneecap no mester tin plataforma pa presentá i esei ta konta pa kualke otro artista ku ta kanta algu di menasa òf ta pro violensia”, segun e mandatario. Starmer tambe a referí na otro grupo di rèp ku el a pidi pa saka for di programa dje festival pa motibu ku su miembronan ta apoyá e movementu libanes Hezbola.
“BBC mester splika kon e kos akí a tuma lugá”, e mandatario a bisa referiendo na e kadena britániko ku a retransmití e evento.
Promé ku e aktuashon di Kneecap, un dje miembronan dje duo di ‘rap punk’ Bob Vylan a hasi yamada riba e multititut pa respondé e koro “Morto, morto pa IDF”, referiendo na e abreviashon na ingles di Forsanan Armá Israelí.
Polis a duna di konosé di ta eksaminando e videonan pa determiná si a kometé un delito.
Despues dje krítikanan, e organisadónan dje festival a bisa di a keda “konsterná”. “Nos ta rekordá tur hende envolví den produkshon dje festival di Glastonbury ku no tin lugá pa anti semitismo, tampoko diskursonan di odio òf yamada pa violensia”, segun e organisadónan di un dje festivalnan di mas popular di Reino Uní.
