MONTEVIDEO, AP.- Ku un petishon pa realisá “elekshon presidensial liber, transparente i kreibel, konforme Konstitushon venezolano”, e reunion di Grupo di Kontakto Internashonal pa Venezuela a terminá na Montevideo. 14 pais europeo i merikano a partisipá den e reunion aki.
E elekshon mester konta ku “tur garantisia nesesario” segun e deklarashon final, lesá pa kansier uruguayo Rodolfo Nin Novoa i e representante pa Asuntu Eksterior i Polítika di Seguridat di Union Europeo, Federica Mogherini.
E petishon pa elekshon presidensial demokrátiko a wòrdu firmá pa Uruguay, Union Europeo, Costa Rica, Ecuador, Spaña, Italia, Portugal, Suesia, Alemania, Fransia, Ulanda i Reino Uní.
Uruguay no a pidi elekshon, pero mas bien un diálogo entre ámbos parti. E firma ta nifiká un kambio den e pais su posishon kontra Venezuela.
Den e konferensia di prensa final, e boseronan di e grupo a bisa ku Bolivia no kier a firma e deklarashon komo ku e pais no ta di akuerdo ku algun punto. México tampoko no a hasi esaki debí ku e no ta integrante di Grupo di Kontakto Internashonal, apesar ku su kansier a partisipá den e reunion na Montevideo.
E reunion na Montevideo a kuminsá ku un diskurso di e presidente anfitrion Tabare Vazquez.
