WILLEMSTAD.- Grupo Klesch lo no papia ku prensa durante e negosiashonnan ku ta tumando lugá aktualmente. Diferente medio a pidi pa e posibilidat pa papia ku e grupo, inkluso su presidente Gary Klesch ku tabata na Kòrsou e siman aki. Ni di parti di e tim di negoshashon PMO ni di parti di Refineria di Kòrsou (Rdk) a haña ta oportuno pa honra e petishon aki.
Básikamente e pensamentu ta ku e negosiashonnan ta den un fase masha importante awor aki. Kualke kontesta riba preguntanan sensitivo por krea mal interpretashon i kisas hasta disgustu i malkontentu i esei no ta na benefisio di e negosiashonnan. “Pa awor aki nos no ta konsiderá oportuno pa pidi nan papia ku prensa”, asina un bosero a bisa EXTRA. El a indiká si ku riba término lo duna mas transparensia posibel.
Loke si representantenan di e grupo ta hasiendo ta papia ku diferente entidat ku ta importante den e struktura di e refineria di Kòrsou. Por sierto EXTRA a komprondé ku e grupo i su ekspertonan a laga un bon impreshon atras pero di otro banda ta pidiendo koutela. Manera a bisa na diferente okashon, e evaluashon tékniko ku ta tumando lugá ta pa studia e posibilidatnan pa hasi negoshi. E grupo no a bin aki pa tene kuenta ku situashon di Kòrsou pero ku un meta komersial. “Nan no a bin pa nos kara bunita pero ku e meta ku nan ta saka dividendo di kualke paso ku nan tuma”, asina a bolbe bin dilanti den último dianan.
Promé minister Eugène Rhuggenaath ku tabata di bishita na e kompania djabièrnè último na Alemania i djaluna a risibí Gary Klesch i su mishon na Kòrsou, a ekspresá optimismo pa e negosiashonnan. Di otro banda den seno di gobièrnu i Rdk tin e koutela pa no krea espektativanan falsu. E bishitá ta sigui meskos ku e negosiashonnan riba e aspektonan tékniko.
