WILLEMSTAD.- Djasabra anochi na Villa Royal na Skalo a tuma lugá e presentashon di Grupo Zjangilae su trahe pa Karnaval 2020. E grupo bou di direkshon di Ludson Valks a presentá un bon shou.
Deskripshon
Nos kas ta den krísis, nos kas ta den défisit. Nos kas ta den nesesidat. Ta ora pa abo komo siudadano realisá ku nos bida ta un sírkulo parti den diferente komponente manera: amor, famia, edukashon, rèspèt, balor, salú, union i finansa ku nos ta deseá di mehorá i/òf kambia.
P’esei Grupo Zjangilae kier presentá ‘The Circle of life’. E sírkulo di bida di nos dushi Kòrsou.
Nos por kompará e sírkulo aki ku un wil di baiskel kaminda kada área ta meskos ku un spak di wil. Si un di e spaknan ta mas kòrtiku ku e otronan, e ta trese desbalanse i ta pone ku e wil no por drai optimal mas.
Ta importante pa kada habitante di Kòrsou revisá e spaknan di su sírkulo i evaluá kua ta e áreanan ku ta sobresaliendo i kua ta esunnan ku mester di mas atenshon.
Di e manera aki nos por realisá kon grandi e buraku ta entre kaminda nos ta aktualmente i kaminda nos mester ta. P’asina nos por traha riba esakinan i trese balanse den kada un di nos su bida. Si kada un di nos ta den balanse, naturalmente nos pais tambe lo ta den balanse.
Kòrsou ban hasi uso di e sírkulo di bida pa nos por logra yega kaminda ku nos kier ta, pasó ainda falta hopi mas!.
Ku e mensahe aki na mente, Grupo Zjangilae ke invitá tur miembro i tur interesado pa bira miembro pa asistí na nos reunion djadumingu, 1di desèmber 2019, na Klup di Shell na Suffisant di 7 or pa 9 or di anochi.
