WILLEMSTAD.- Ayera 7or di anochi AGKK a tene un enkuentro ku lidernan di gruponan di Karnaval pa dje forma ei saka e órden di presentashon den e diferente marchanan. E enkuentro akí a tuma lugá den Sambil i a konta ku transmishon di e plata forma digital di EXTRA. Ban kuminsá ku Marcha riba Kabai, nos a tuma nota ku ta 4 grupo tin partisipando djadumingu awor den e marcha. Segun splikashon huntu ku e marcha lo tin un desfile di motosaikel i tambe outonan Volkswagen ‘Beetle’. Kemen henter un ambiente rondó di e Marcha di Kabai. Nos ta sigur ku lo tin basta hende kantu di kaya djadumingu awor pa e ambiente di sinta i warda e marcha pasa. E gruponan di tiner a bira mas tantu, entre nan tin algun brasbènt ku a inskribí komo grupo. Pa hubenil tambe e gruponan a krese i einan lo ta interesante pa wak e kreatividat di e gruponan. Pa gruponan di marcha grandi e sakamentu di number tin su tenshon kuné, pasó tin gruponan ku tin deseo pa logra un number ku no ta muchu dilanti. Bo tabata mira e legria ora e gruponan a skohe un number ku nan ta satisfecho kuné. Na final dje anochi a duna e gruponan oportunidat pa nan por a hasi interkambio di numerashon promé ku e aktividat a terminá. Por a tuma nota di algun grupo ku a hasi interkambio i a mèldu esaki na AGKK.
