BOGOTA, AP.- E lider opositor venezolano Juan Guaidó a partisipá den un konferensia na Bogotá djaluna. El a reuní ku representantenan di Merka i diferente pais latinoamerikano mas, i huntu nan a akusá e gobièrnu venezolano aktual di fomentá terorismo.
Guaidó, konsiderá komo e presidente legal di Venezuela, a wòrdu risibí na Colombia, kaminda el a wòrdu kompañá pa dignatarionan manera e sekretario di Estado Mike Pompeo den un konferensia regional tokante formanan pa lucha kontra terorismo.
E siman aki ta bira un aña desde ku Guaidó a deklará su mes komo presidente legítimo di Venezuela, den un intento pa deshasí di Maduro.
Pompeo a elogiá e paisnan latinoamerikano pa rechasá Hezbollah. Diferente nashon inkluyendo Paraguay, Honduras, Guatemala i Colombia a deklará Hezbollah komo un organisashon terorista òf tin intenshon di hasi esaki.
Pompeo a deklará ku Hezbollah a “haña refugio na Venezuela bou di mando di Maduro. Esaki ta inaseptabel”.
Te ainda e gobièrnu di Maduro a logra evadí tur sanshon di Merka dor di usa e “black market” i otro negoshinan manera oro.
Maduro a ninga reiteradamente ku e ta dunando gruponan rebelde kolombiano refugio, ounke habitantenan di e regionnan na frontera a reportá esaki su presensia.
