CARACAS, AP.- E lider opositor Juan Guaidó a anunsiá ku e ta preparando pa presentá un serie nobo di preshon kontra mandatario Nicolás Maduro.
El a antisipá mas sanshon internashonal kontra tur “kriminal i mas akshon legal riba kaya pa oumentá e preshon interno kontra Maduro i haña kontròl di Palasio Legislativo.
Oposishon a usa e sanshonnan ekonómiko di Merka i mobilisashonnan riba kaya pa fòrsa retiro di e mandatario iskierdista kende a logra superá e preshonnan interno i eksterno debí na e respaldo militar i sosten di e gobièrnunan di Rusia, China, Turkia i Cuba.
Komo parti di e proseso komo presidente interino di Venezuela, Guaidó a anunsiá nombramentu di Juan Pablo Soltedo komo Kòntròlùr Spesial i kreashon di Konseho di Kòntròlùr pa fortalesé transparensia di su gobièrnu, protekshon di plaka públiko i pone preshon riba esnan ku el a identifiká komo “e diktadura su kriminalnan finansiero”.
Guaidó a regresá despues di un gira ku a inkluí un reunion ku su aliado di mas importante: presidente merikano, Donald Trump.
Guaidó a pasa dor di inmigrashon den e aeropuerto prinsipal di e pais. E no a wòrdu detené apesar ku el a bandoná Venezuela, desafiando e prohibishon di biahe imponé pa e gobièrnu di Maduro.
