MEXICO, AP.- Miembronan di Guardia Nashonal i outoridatnan di imigrashon di Mexico a subi kantidat grandi di migrantenan sentro amerikano den bùsnan algun ora despues ku nan a drenta e pais i a kana vários kilometer.
E migrantenan a keda konkluí di e forma ei nan hornada den un parada ora kantidat di efektivonan di guardia nashonal a bai riba nan i a detené nan na 100 meter di distansia. Despues di un negoshashon kòrtiku, e migrantenan a baha na rudia pa hasi orashon i a kuminsá grita “Nos ke pasa”.
E efektivonan di guardia nashonal a bai riba nan i enfrentá esakinan. Tabatin algun pushamentu i a spùit gas di peper miéntras nan tabata rondoná e miembronan di e karavana.
Hopi di e migrantenan a subi den bùsnan di forma pasífiko. Muhénan ku tabatin yunan na man i den brasa a grita yora na momentu ku nan tabata kana bai e bùsnan. Otronan a resistí i mester a keda detené pa outoridatnan pa nan drenta e bùsnan. Un hòmber ku a keda lastra pa e agentenan tabata grita “nan a mata mi ruman hòmber, mi no ke muri”, esaki referiendo na e echo ku si mand’é bek su pais. Otro muhé tabata yora “mi tin un nesesidat grandi ku mi yunan”.
E kaya a keda yen di sushi, bòter, sakunan di plèstik i paña. Un hòmber rabia, bisti di kamisa blou a grita “Esaki ta un guera kontra e hondureñonan”.
