SAN JOSE, PINULA, GUATEMALA, AP.- Forsanan di seguridat di Guatemala, a purba kontené un disturbio den un sektor korekshonal di menor ku a laga dos morto, kuater rehen i vários herido.
E bosero di Polis, Pablo Castillo a informá e morto di dos persona durante e disturbio ku a kuminsá djadumingu den Sentro Korekshonal Etapa II den munisipio di San Jose Pinula, 20 kilometer ost di e kapital guatemalteko.
Entre e demandanan prinsipal, e prizoneronan kier mihó kuminda i bishita i traslado di por lo ménos 250 menor ku ta pertenesé na e mesun gang i ku ta detené den otro sentronan di detenshon.
E prezunan a mustra periodista un di e rehennan. Di bui el a roga pa su bida i a pidi outoridat pa duna e prezunan loke nan kier.
“Nos kier pa boso trese nos kompañeronan. Ta tin muchu maltrato kaba i nos tin miedu pa boso kima nan manera boso a yega di hasi”.
E prezu tabata referí na un kandela di dos siman pasa kaminda 40 adolesente a muri.
