SIUDAT DI GUATEMALA, AP.- E presidente guatemalteko Alejandro Giammattei a anunsiá un estado di prevenshon den dos munisipio pa kombatí diferente gang. Esaki ta duna ehérsito pèrmit pa realisá aktividatnan di seguridat riba kaya.
Giammattei a señalá djabièrnè ku e lo usa ehérsito i Polis Nashonal Sivil pa detené tur integrante ku ta operá den munisipio di Mixco i San Juan Sacatepequez, ámbos den departamento di Guatemala. E dos munisipionan tin un índise haltu di kriminalidat. E estado di prevenshon lo keda vigente durante shete dia.
Segun e lei di òrdu públiko di e estado di prevenshon, e deklarashon ta laga ehérsito militarisá servisionan públiko, limitá tur reunion di gruponan grandi riba kaya, disolvé tur grupo òf manifestashonnan públiko ku tuma lugá sin outorisashon i ta prohibí sirkulashon di vehíkulonan na sierto lugá.
E estado di prevenshon a wòrdu ordená via un dekreto ku e ministernan guatemalteko a firma. E Ministerio di Defensa Nashonal a informá ku a desplegá 1.000 sòldat riba kaya.
