Ademas di riba Iran, ayera Israel a lansa atakenan severo riba Libanon. E komunidat a hañ’é ta hui pa buska refugio den parti zùit dje pais.
BEIRUT, Libanon (AFP).- E guera ku Merka i Israel a start kontra di Iran a ekstendé ayera pa henter Medio Oriente i ta menasá na hinka ekonomia mundial den un káos despues ku Libanon i paisnan eksportador di petrolio di Golfo a keda lastrá den e konflikto. E repúblika islamita a kontra ataká for di djasabra tumando komo blanko e basenan militar norteamerikano i e teritorio israelí, i despues e paisnan di Golfo, loke a lanta spantu riba e suministro di petrolio i a pone ku preis di krudo a subi.
Durante e di tres dia dje guera, e presidente merikano, Donald Trump, a bisa di lo no duda pa manda tropanan na tera den Iran si esei ta nesesario. Mas aleu el a menasá ku un “ola grandi” di atakenan nobo. “Ni sikiera nos a kuminsá bati nan ku forsa. E ola grandi mester yega ainda”, segun Trump a bisa na CNN.
E sekretario di defensa norteamerikano, Pete Hegseth, tambe a nenga na deskartá e mandamentu di tropanan den Iran i a indiká ku e guera por prolongá te hasta pa “seis siman”. Eksploshonnan violento a sakudí vários bario di Teheran.
Iran ta akusá Merka i Israel di a lansa un bombardeo kontra dje sitio nuklear di Natanz, ku tabata un dje blankonan prinsipal di atake durante e konflikto di yuna 2025. Israel a ekstendé su operashonnan pa Libanon, komo reakshon riba atakenan dje movementu islamita Hezbola, ku tin relashon ku Iran. Outoridatnan libanes a anunsiá un balansa di 52 morto i 154 herido.
Na Iran, e organisashon Red Crescent iraní a menshoná e sifra di 555 morto for di inisio dje guera. AFP no por a verifiká e saldo di víktimanan di forma independiente.
Iran mes a anunsiá di a ataká 500 ophetivo merikano i israelí, entre nan e ofisina di promé minister Benjamin Netanyahu. Ademas, nan a atvertí di lo no sosegá “te ora ku nan derotá e enemigu”.
“Nan lo no ta sigur na ningun parti di mundu”, segun Iran a duna di konosé. Te ku ayera tardi a referí na kuater militar merikano kende nan a muri, pero Trump a rekonosé ku e sifra por oumentá.
E presidente iraní, Masud Pezeshkian, a duna di konosé ku e pais “lo no keda ketu” despues di a denunsiá “atakenan kontra di un skol i un hospital”, atribuí na bombardeonan israelí i norteamerikano. Iran mas aleu a bisa ku un atake ku nan a sufri djasabra a kousa 168 morto den un skol den parti zùit dje pais.
Guera a intensifiká ayera, ku atakenan di Merka i Israel tantu riba Iran komo tambe Libanon.
