Presidente ekuatoriano Daniel Noboa (r) i su kolega kolombiano Gustavo Petro kendenan ta den ‘clinch’ ku otro relashoná ku sierto ekspreshon hasí.
BOGOTA, Colombia (AFP).- Presidente kolombiano, Gustavo Petro, ayera a anunsiá di lo demandá penalmente e promé mandatario ekuatoriano, Daniel Noboa, pa kalumnia despues ku Noboa a akus’é di a reuní ku supuesto miembronan di narkotráfiko den teritorio ekuatoriano.
Meimei di un kantidat grandi di akusashon, Noboa a reklamá di Petro un aparente falta di apoyo pa kombatí narkotráfiko na frontera entre e dos paisnan, ku for di febrüari ta den un guera komersial ku belasting di 100%. E krísis a eskalá na nivel diplomátiko despues ku Petro a tilda komo “prezu polítiko” e persona di Jorge Glas, kende tabata vise presidente di e eks-gobernante sosialista Rafael Correa entre 2013 i 2017 i kondená pa korupshon, loke a kondusí na retiro di embahadornan di tur dos nashon.
“M’a disidí pa demandá penalmente e presidente Noboa pa su kalumnia”, segun e mandatario kolombiano a skirbi riba X. Den deklarashonnan resien na e revista kolombiano Semana, Noboa a bisa ku Petro a reuní ku miembronan dje movementu “Revolución Ciudadana”, liderá pa Correa (2007-2017) , durante di un bishita privá na e haf di Manta na okashon ku el a asistí na e toma di poseshon dje ekuatoriano den 2025.
“Algun dje miembronan ei tin konekshon ku Fito”, konosí di e ekuatoriano José Adolfo Macias, hefe dje poderoso grupo narko Los Choneros ku tin relashon ku e grupo mehikano Sinaloa i kende a keda kapturá na Manta i ekstraditá pa Merka despues ku Petro tabata den e haf di piskadónan. Noboa ta bisa ku “si el a reuní físikamente i kara-kara ku Fito, no ta algu ku mi por bisa. “Pero laga nos bisa ku e tabata ku e mesun grupo i den e mesun zona”.
“Mi no sa si bai un sitio na Ecuador ta nifiká ku bo ta bira sospechoso di tin kontaktonan kriminal”, segun el a bisa. Petro mas aleu a trese dilanti di lo publiká e lista di ekuatorianonan kapturá i ekstraditá durante di su gobièrnu “pa no tin duda” di su lucha kontra di krímen organisá.
