WILLEMSTAD.- Despues di un kontrakshon fuerte na 2020 komo konsekuensia
di e pandemia di covid-19 i e medidanan estrikto ku a tuma pa limitá esaki, aktividat ekonómiko a rekuperá konsiderablemente na Kòrsou komo Sint Maarten den 2021, ku
un kresementu di PIB real di 5,0% na Kòrsou i 8,6% na Sint Maarten. Asina e proyekshonnan di
Centrale Bank van Curaçao en Sint Maarten (CBCS) ta indiká den Banko su Boletin Ekonómiko
di yüni 2022.
Komo algu nobo, CBCS ta introdusí e boletin ekonómiko den lunanan di mart, yüni, sèptèmber i desèmber.
Presidente di Banko Sentral sr. Richard Doornbosch a trese dilanti ku: ‘loke a impulsá e rekuperashon ekonómiko fuerte akí ta prinsipalmente un
kresementu kontinuo den turismo di estadia, partikularmente den e di dos mitar di 2021. Entre
otro debí na fleksibilisashon gradual di e medidanan, tantu na Kòrsou komo na Sint Maarten e
kantidat di turista di estadia a rekuperá muchu mas lihé ku loke a proyektá inisialmente”.
Komo resultado, a revisá e kresementu di PIB
proyektá pa 2021 supstansialmente kompará ku loke a publiká den e Boletin Ekonómiko di
mart 2022, esta: 2,0% pa Kòrsou i 4,5% pa Sint Maarten.
Ademas, e proyekshonnan mas resien di CBCS ta indiká ku na 2022 e rekuperashon ekonómiko lo kontinuá na tur dos pais di e union monetario. Tantu na Kòrsou komo na Sint Maarten, ekonomia lo krese prinsipalmente debí na un rekuperashon duradero den aktividat turístiko, entre otro, normalisashon di turismo krusero, i na un oumento den invershon privá, manera proyekto
komersial i residensial, Doornbosch ta splika.
No opstante, e oumento den tenshon geopolítiko
debí na e guera na Ukrania ta tira un sombra skur riba e perspektiva akí, ya ku esei ta poniendo preshon riba preis di materia prima riba merkado internashonal ku ya kaba tabata relativamente haltu.
Debí ku Kòrsou i Sint Maarten ta dependé bastante di importashon, un oumento den preis di importashon lo hisa inflashon i di e manera ei limitá forsa di kompra den henter e union
monetario,’ asina presidente di CBCS ta atvertí. Ku e senario akí na mente, CBCS a revisá su proyekshon di kresementu pa 2022 pa Kòrsou i Sint Maarten, bahando esaki na komparashon ku
e perspektiva presentá na mart di 2022, te na 5,2% i 6,2%, respektivamente.
Na mes momento, pa
Kòrsou ta premirá un oumento supstansial di inflashon, di 2,2% na 2021 pa 6,1% na 2022. Pa Sint Maarten tambe ta premirá ku inflashon lo aselerá i yega te 5,9% na 2022, kompará ku 2,8% na 2021.
Mas aleu, CBCS ta premirá ku riba término mediano e ritmo di rekuperashon lo baha un poko.
Pa 2023, ta proyektá un kresementu di PIB real di 3,0% pa Kòrsou i 3,9% pa Sint Maarten. Ta premirá
ku, aunke preshon inflashonario lo keda haltu, e lo baha un poko na 2023, mirando ku ta proyektá un bahada di inflashon na Estádos Unídos, ku ta e partner komersial mas importante di e union monetario. ‘En bista di e kresementu ekonómiko proyektá, ta premirá ku presupuesto di tur dos pais lo mehorá i ku nan défisit fiskal i kuota di debe lo baha gradualmente riba término mediano,’
asina presidente di CBCS Richard Doornbosch ta konkluí.

LAGA UN KOMENTARIO

Please enter your comment!
Please enter your name here