WASHINGTON (AFP).- Union Europeo, China i Canada a anunsiá represaya fuerte kontra di e impuesto di 25% riba staal i aluminio imponé di parti di Merka.
China, e di dos potensia mundial i e produktor mas grandi di staal, a primintí di hasi “loke ta nesesario” pa “salbaguardiá su derechinan i interesnan legítimo”.
Beijin a bisa ku “e akshonnan di Merka ta violá reglanan di Organisashon Mundial di Komersio “na un manera hopi serio”. Ademas di ta “daña di forma grave e sistema komersial multilateral basá riba reglanan, segun e bosero d Ministerio di Relashonnan Eksterior di Beijing.
Canada for di awe lo apliká impuesto nobo riba importashonnan prosedente di Merka na un balor di 20.700 mion dòler komo represaya pa e oumento di gastu di duana ku ta “no hustifiká i no rasonabel” di parti di Washington, segun e minister di finansa,
Dominic LeBlanc.
Claudia Sheinbaum, presidente di México, ku ta otro sosio dje akuerdo di komersio liber di Nort Amerika (T-MEC), a anunsiá di lo warda te 2 di aprel pa disidí nan akshonnan.
Brasil, un dje proveedornan grandi di staal na Merka, lo no tuma medida, segun e minister Fernando Haddad.
Di su parti, Union Europeo a kontestá ku lo bin renobashon dje impuesto riba produktonan norteamerikano ku a keda adoptá den 2018 i 2020 pero ku nan a laga sin efekto. Ademas, nan a bin ku medidanan den un pakete nobo di impuesto riba produktonan norteamerikano, ku ta inkluí ‘whiskey’, yatenan i bròmfiets Harley Davidson.
Total, e grupo europeo lo kobra impuesto di importashon na balor di 28.000 mion dòler.
