WASHINGTON, USA (AFP).- E presidente norteamerikano, Donald Trump, a dal un buèlta ayera relashoná ku su guera komersial, anunsiando un “pauze” di 90 dia riba impuesto apliká riba desena di pais, ku eksepshon di China. E impuesto riba produktonan chines ta subi ku 125% pa motibu ku e pais a tuma represaya.
“Mester ta fleksibel”, segun e republikano a bisa na periodistanan na White House. El a rekonosé ku su anunsio riba e ofensiva di duana manera el a hasi siman pasá “a spanta” invershonistanan i a duna nan “keintura”.
Riba su plataforma Truth Social e presidente a reprochá China pa loke el a konsiderá komo “falta di rèspèt” i a kastigá e pais ku tarifanan di duana di 125%, “ku efekto inmediato”.
“Nos ta spera ku den futuro China lo realisá ku e dianan pa estafá Merka i otro paisnan ya no ta sostenibel ni aseptabel”, segun el a agregá.
Oranan despues di hasi chèrchi di su sosionan bisando ku nan ta “sunchi mi atras” pa negoshá akuerdonan komersial, Trump a dal un paso atras.
“Komo mas ku 70 pais a solisitá pa negoshashon por tuma lugá, m’a outorisá un pousa di 90 dia i impuesto resíproko sustansialmente redusí durante dje periodo ei, di 10, tambe ku efekto inmediato”, segun Trump a duna di konosé.
