DEN HAAG, ULANDA, AFP.- E guera na Ukrania a oumentá e peliger di uso di armanan di destrukshon masivo, inkluyendo kímiko, segun atvertensia di e organismo internashonal enkargá ku kontròl di e armanan aki.
“E situashon na Ukrania a bolbe oumentá e menasa real di armanan di destrukshon masivo, inkluyendo armanan kímiko”, segun deklarashon di presidente di Organisashon pa Prohibishon di Armanan Kímiko (OPAQ), Fernando Arias.
E presidente di OPAQ a rekordá ku Rusia i Ukrania tabata forma parti di e 193 paisnan ku a “komprometé ku bou di ningun sirkunstansia lo desaroyá, produsí, atkerí òf usa armanan kímiko”.
Apesar di esaki, outoridatnan ukraniano i ruso a akusá otro mutuamente durante e último lunanan pa un posibel uso di armanan nuklear, kímiko i biológiko.
E presidente a kritiká Siria tambe, aliado di Rusia pa inkumplimentu di petishonnan di e organismo internashonal. E gobièrnu sirio a ninga visa na un inspektor di OPAQ i no a tene medidanan di e organisashon internashonal na kuenta.