Sint Maarten ta haña 39 mion florin yudansa pa presupuesto

PHILIPSBURG.- Sint Maarten tin mester ku hopi urgensia di un yudansa di presupuesto di 39 mion florin. Sekretario di estado Raymond Knops a bai di akuerdo e siman aki pa otorgá e yudansa finansiero aki na Sint Maarten, asina el a informa Tweede Kamer. Manera ta konosí e relashon entre gobièrnu di Ulanda i Sint Maarten ta leu for di bon, debí ku na momentu ku Corona a bati na porta di e islanan eks Antia esaki a pèrkurá pa un desaster den sentido ku e kantidat di hendenan den pobresa a oumentu di un dia pa otro.

Tur e islanan a bati na porta di pais madre Ulanda pa yudansa i Ulanda a probechá a eksigí e reformanan ku pa hopi aña e gobièrnunan di turno a primintí sin kumpli kuné. Den kaso di Sint Maarten e polítikonan a manda un karta pa Nashonnan Uni den kua a denunsia komportashon rasista i kolonial di Ulanda. Esaki a empeorá e relashon.

Den un karta ku sekretario di estado Knops a manda pa Tweede Kamer e ta splika ku gobernashon di Sint Maarten a kumpli pa gran parti ku e eksigensianan pa nan haña yudansa finansiero pa nan presupuesto. Den  e kuadro ei Knops a bai di akuerdo pa duna Sint Maarten e 39 mion florin asina ku premier Silveria Jacobs firma e agènda di ehekushon.

LAGA UN KOMENTARIO

Please enter your comment!
Please enter your name here