BOGOTA, Colombia (AFP).- ELN ayera a anunsiá un periodo di pas “unilateral” n a Colombia relashoná ku fiesta di Pasku i fin di aña, segun un komunikado dje grupo rebelde. E medida ta tuma lugá algun dia despues di un atake di Ehérsito di Liberashon Nashonal (ELN) ku drone nan i eksplosivonan, ku a laga shete sòldá morto i 30 herido den un base militar den nort dje pais.
Direkshon nashonal di ELN a ordená “tur su strukturanan pa no realisá operashon militar kontra di Forsanan Armá di Estado”, segun nan ta bisa den un komunikado. E periodo di pas ta start 24 di desèmber i lo ekstendé te 3 di yanüari di 2026. ”Nos ta aklará ku no ta polítika di ELN pa realisá operashonnan militar ku ta afektá poblashon”,segun e grupo ta bisa.
Siman pasá e rebeldenan a dekretá algun dia di pas pa sivilnan i a menasá e forsanan di òrdu den regionnan ku nan ta dominá. Diálogonan di pas entre gobièrnu dje presidente iskierdista Gustavo Petro i ELN ta suspendé for di 2024.
“Nos a risibí e mensahe aki ku algu di alivio, pero tambe ku angustia”, segun Iris Marin, enkargá ku “Defensoria del Pueblo”. Segun esaki, e periodo di pas mester a relashoná tambe ku otro gruponan armá ku ELN ta enfrentando .
Despues di su yegada na poder den 2022, Petro a purba negoshá pas ku ELN, komo parti di su polítika batisá komo “pas total”. Pero esaki a para kaba na nada.
