Mi Negoshi Shared and Support Services
Nos promé programa di 2025 ta dediká na kos positivo, i partikular pa nos negoshinan. Awe, nos tin tres invitadonan spesial: Riglene Cristina, ku ta e kordinadó; Angeninne Nicolina; i Thais Evertsz, ku ta dirigí Mi Negoshi Shared and Support Services, ku a habri nan porta den luna di Novèmber. Nan a duna un splikashon di e trabounan di Mi Negoshi i e benefishinan pa e empresario.
E idea
Riglene ta splika ku Mi Negoshi Shared and Support Services ta un inisiativa kolaborativo di Ministerio di Desaroyo Ekonómiko (MEO), Stichting Beheer MKB, i Kámara di Komèrsio Industria. E proyekto a originá for di e añanan 2019/2020. Un periodo kaminda tabata evidente ku empresarionan tabata tin mester di yudansa. “Si hopi hende ta kòrda e temporada di COVID, empresarionan por a registrá pa por keda kla ku TBZO (Tarif Bijzonder Ziektekostenverzekering). Hopi empresario tabata tin mester di guia ku esaki”, Riglene ta bisa. Esaki a sirbi komo indikashon pa MEO pa kontinuá ku e proyekto. Asina den novèmber 2024, e inisiativa a kristalisá di forma físiko. Riglene ta enfatisá: “Awor nos tin un ofisina físiko. Durante e temporada di COVID, tur kos tabata digital, pero awor nos a bai mas leu ku un presensia físiko pa yuda I pone atenshon personal na nos klientenan empresario.” Mi Negoshi Shared and Support Services ta brinda un plataforma di sosten i guia pa fortifiká i empoderá e komunidat di negoshinan na Kòrsou.
Nesesidat humano
Riglene ta splika ku e nesesidat pa habri un ofisina físiko no ta solamente ku tin un demanda haltu, pero tambe un nesesidat humano: “E kalor humano ta importante, apesar ku tur kos ta digital, kontakto personal ta keda esensial. Bo ta ripara tambe ku tin sierto negoshi ku ta frakasá pa falta di guia. Esaki ta e motibu ku nos a habri e ofisina.”
Mi Negoshi Shared and Support Services
Mi Negoshi Shared and Support Services ta duna e siguiente servisio. Riglene ta konta ku un deskripshon kla loke nan ta ofresé pa sostené empresarionan lokal. Mi Negoshi ta konektá empresarionan ku ekspertonan den área di negoshi. Tambe e ta konektá nan ku otro organisashonnan relevante. Mi negoshi ta brinda servisionan manera entrenamentu I eventonan pa e empresario lokal. Kual ta duna e empresario e oportunidat pa forma konekshon, kolaborashon I programanan ku ta duna nan un guia pa mehorá nan negoshi I desishonnan stratégiko.
Proseso di sosten
E promé paso pa kualke empresario ku ta buska sosten ta registrá nan negoshi na Kámara di Komèrsio (KvK). “E kliente empresario mester kuminsá na registrá nan negoshi na KvK, paso un idea òf plan no ta sufisiente pa nos. Pa nos ta importante ku e ta inskribí, paso esei ta mustra ku e ta formalmente riba ruta empresarial,” Riglene ta indiká. Di e momentu ku e empresario ta registrá, e por yega serka Mi Negoshi Shared and Support Services. Por ehèmpel si un kliente tin nesesidat pa desaroyá un plan di maneho, e organisashon ta konektá e ku un eksperto. Mi negoshi ta supsidiá un parti di e gastunan relashoná ku e proyekto I e empresario ta kubri sobrá.
Inskribí na KvK promé
Riglene ta splika ku e proseso ta kuminsá ku e idea pa lanta un negoshi. Promé kos ku e hende mester hasi ta bai Kámara di Komèrsio pa formalisá su idea. Na KvK bo ta wòrdu asistí pa deskubrí ki tipo di entidat bo negoshi ta, sea ta un “eenmanszaak”, NV, BV, òf koperativa. Despues di inskribí, bo ta klarifiká bo meta i pasa pa e siguiente fase. Na e momento ku bo kaba di inskribí na KvK, bo por drenta den kontakto ku Mi Negoshi Shared and Support Services. Mi Negoshi ta evaluá kiko e empresario falta òf kiko e mester di yudansa kuné, por ta plan di maneho, ku ta yuda e empresario haña fiansa na banko. Plan di merkadeo, pa promoshon di e produkto òf servisio. Nos ta e promé persona ku bo ta drenta den kontakto kuné sea ta via di telefòn, ‘WhatsApp’ òf un plataforma digital. Un sita ta keda traha kaminda e empresario ta risibí un formulario pa yena informashonnan ku ta relevante pa nos. Riglene ta aklará ku Mi Negoshi ta enfoká riba solushon konkreto pa pèrdè ménos tempu. Mi Negoshi ta hasi un análisis di e empresario su situashon. Si e problema ta simpel, Mi Negoshi mes lo duna un respuesta. Den kaso ku e situashon ta spesífiko, un eksperto ta wòrdu asigná pa yuda e empresario.
Na e manera aki, Mi Negoshi ta fasilitá un proseso struktural i efisiente pa konvertí e idea di e empresario den realidat di un forma formal i sotenibel.
Arte di negoshi
Angeninne ta añadí ku no ta sufisiente pa un empresario ta bon den krea su produkto òf servisio pero den banda e mester tin e arte di hasi negoshi tambe. Por ehèmpel, porta bo ta bon den traha eiskrim, bolo pero bono ta bon den e arte di hasi negoshi. Anto e ora ei bo ta yega serka nos.
Unda tin mas nesesidat
Riglene ta menshoná ku un di e kosnan ku hopi empresario tin mester di yudansa kuné ta impuesto i atministrashon. E no ta un sekreto ku hopi empresario ta enfrentá desafio den e aspektonan aki. Ora un persona ta bende, por ehèmpel, pastechi, e ta a hasi ganashi, pero hopi bia e no tin tempu pa analisá e fluktuashon entre gastu I ganashi. E parti di atministrashon ta kompliká, i e no ta fásil pa un hende so manehá e kosnan finansiero. E impuesto, ta un gran reto pa hopi empresario. Esaki ta un tópiko difísil, pero Riglene ta indiká ku Mi Negoshi tin eksperto ku por guia e empresario pa hasi e proseso mas fásil. Mi Negoshi ta buska e eksperto ku ta mas basá riba e nesesidat di e empresario.
Mi Negoshi ta kere ku e sistemanan mester ta un tiki mas simplifiká pa e empresario?
Riglene ta menshoná ku e sistema di impuesto ta un desafio difísil pa hopi empresario, I ta kere ku e sistema mester ta mas simplifiká pa yuda e empresario. Segun Riglene, durante e trayektoria pa habri, Mi Negoshi a sinta ku diferente stakeholders manera “belastingdienst” i e a eduká nan mes riba e tema aki. Riglene ta sugirí ku si un empresario no ta komprondé e sistema di impuesto, e por konsiderá buska un kompania pa hasi e trabou. Por ehèmpel, si un hende ta bende renchi di orea, e no tin tempu pa preokupá riba impuesto, e por yama un eksperto pa maneho e parti aki di su negoshi. Si un empresario tin duda, Mi Negoshi ta disponibel pa yuda. Tambe nos por kontaktá bo ku un persona mas basá riba e tereno aki pa klarifiká i pasa e informashon pa e empresario.
Tayernan ku ta organisá
Relashoná ku e tayernan ku Mi Negoshi ta organisá, Angeninne ta elaborá ku nan no a kuminsá ku e tayernan pa e empresario ainda. E ta un idea ku Mi Negoshi a pensa pa lanta. Esaki lo inkluí temanan manera impuesto, merkadeo, e partinan general ku un negoshi mester konsiderá. E tayernan ta enfoká riba abilidatnan suave, ku ta esensial pa un empresario. Esaki ta enserá komunikashon, kon bo ta bende bo mes i bo produkto. E tayernan no ta simplemente un kurso, sino e enfoke ta e desaroyo personal i mental, algu ku hopi empresario ta falta di komprondé: e pensamentu. E pensamentu ta krusial. Hopi empresario no tin realisá kuantu kos ta nesesario pa lanta un negoshi. Nos ke purba di integrá e pensamentu korekto den e tayernan pa motivá e empresario, duna nan fe i determinashon pa logra e metanan ku nan a proponé.
Konsientisá e komunidat pa hasi negoshi
Thais ta menshoná ku Mi Negoshi no ta simplemente pasa informashon, pero tambe ta duna guia intensivo. Asina e empresario ta haña un idea. ‘Nos ta yuda e empresario pa sigui bai un próksimo nivel. Pa e asuntu di atministrashon, nos ta duna tantu online komo personal guia pa asina e empresario no simplemente ta lora man”.
Riglene a kompartí ku Mi Negoshi a keda aserka pa bai den skolnan sekundario. Kual ta importante pa introdusí e mentalidat empresarial den nos hóbennan. Ta bon pa e hóben bai skol I siña, pero ta bon pa kuminsá inspirá e hóbennan pa lanta nan mes kompania I yuda krese e impakto ekonómiko di nos komunidat. 98.5% di nos ekonomia ta drai riba empresanan mediano I chikí. Implementá e mentalidat di kuminsá un negoshi den skol ta yuda kontribuí na krese nos ekonomia.
Konsientisá mas pa ZZP
Riglene ta menshoná ku e idea di ZZP (Zelfstandige Zonder Personeel/ freelancer) ta un tema ku mester di mas konsientisashon. E ta un sistema ku mester di mas akseptashon na Kòrsou. Riglene ta sugirí ku e mentalidat di ZZP ta un paso duru pa hopi hende, paso bo ta eksponé bo mes na un nivel mas altu, ku ménos garantia. Riglene ta bisa ku empresario ta enfrentá diferente desafio. Komo empresario bo mes mester krea bo stabilidat finansiero. Esaki por ta e motibu ku mayoria hende ta bai traha pa un doño enbes di habri nan mes negoshi. Riglene ta trese e mensahe ku si bo ke hasi negoshi e ta un paso duru I bo mester prepará bo mes mentalmente.
Plannan pa 2025
Riglene ta bisa ku Mi Negoshi a kuminsá ku e parti operashonal ofisial den òktober. N’e momentu ku nan a habri na 2024 ainda tabata tin algun kos chikí ku mester a atendé kuné. Pero pa 2025 tin pensa di bin ku e plataforma di entrenamentu. Kaminda empresarionan por bin.
Angeninne ta agregá ku riba e plataforma komo empresario bo mes por subi I eduká bo mes riba diferente tópiko. “Nos no ta divulgá tur kos ainda. Nos a toka e parti di impuesto pero ainda tin hopi kos mas manera plan di maneho. Tur esaki ta bai ta den e kurso di un par di siman. Porta komo empresario bo no ke hasi tur kos boso pero e simpel echo ta ku bo mester ta òn tòp di loke bo ta hasi”.
Riglen ta indiká ku Mi Negoshi ta duna algun punto balioso pa e empresario por elevá su negoshi na e siguiente nivel. Ademas, nan ta organisá evento di ‘networking’ e kaminda e empresario por konektá ku eksperto i otro organisashonnan. E eventonan ta keda sekreto pa motibu di desaroyo, pero nos ta enfoká riba konstruí un komunidat di empresario ku por yuda i krese huntu. Riba e plataforma sosial, bo lo por enkontrá tur informashon i desaroyo ku nos ta kompartí.
Finansiamentu
Mi Negoshi no ta ofresé fiansa komo tin diferente banko ku ta ofresé e tipo di servisio aki. Sin embargo, no ta solamente e parti finansiero ta importante, sino tambe e guia. E parti finansiero ta un elemento di negoshi, pero pa un empresario, e guia ta mas esensial. Ku guia, bo por sa kon ta manehá bo finansa, i bo por paga bo gastunan di manera mas efisiente.
Mi Negoshi ta situá den Kaya Junior Salas kasi dilanti di KvK. A skohe e lokalidat aki ya jku nan ke mira trafikashon den sentro di siudat. Mi negoshi ta pegá ku KvK pa fasilitá e proseso di registro. Ora e hende kaba di inskribí, e por krusa kaya i bin serka nos. Nos no ta enfoká riba e empresario ku ta kore outo luhoso so, pero nos ta pensa riba e empresarionan ku ta traha pastechi, ku ta un trabou mas chikí, ku tambe por benefisiá di nos servisio. E empresarionan aki por yega nos ofisina fásilmente.
E tres damanan ta konta ku nan tur tres ta den e mundu di empresario. Nan tin e konosementu di kon pa lanta I manehá un negoshi. Tur tres a kana e kaminda I sa kiko ta e dolo di ta un empresario, e parti bon I e parti ménos bon. Ku e konosementu I eksperensia ku nan a pasa aden nan por yuda e empresario mas mihó. Riglene ta finalisá ku e ta kere ku e tim aki tin e ekspertisio di edukashon di skol, pero tambe di eksperensia. E punto ta ku nos tur tres ta empresario i por konektá mas mihó ku e empresario. Hopi hende ta bisa bono por hasi kiko, pero si bo no ta den e mundu ei, bo no por duna konseho. Na dado momentu, e empresario mester por mira e realidat, e parti bon i tambe e parti ménos bon. Manera Thais a bisa, nos no ta djis hasi algu, nos ke eksportá e informashon.
Tin diferente manera pa aserka Mi Negoshi. Preferibel ta pa traha un sita paso e ora ei nan por dediká tempu na e empresario su nesesidat i nan por bin prepará ya e sita por bai struktural. Ta posibel pa kana drenta sin sita. Mi Negoshi ke skucha e empresario i yuda nan spesífikamente riba loke nan mester. Mi negoshi ta habrí di djaluna pa djabièrnè di 8or pa 5or. Orario di sita ta di 9or pa 3or. Tambe por kontakto ku nan via di nan plataformanan sosial I di WhatsApp òf por bèl na 461-0990. Por tira un bista riba e WhatsApp channel kaminda Mi Negoshi ta publiká diferente informashon
