GZE no a resulta loke nan pretendé di ta i Gobièrnu a nulifika akuerdo ku nan

GZE no a resulta loke nan pretendé di ta

WILLEMSTAD. – Gobièrnu di Kòrsou, despues di e risibí konseho di e tim multi disiplinario enkargá ku buska un operadó pa refineria di Kòrsou (MDPT), a notifiká Guangdong Zhenrong Energy Co. Ltd (GZE) den un karta ku Gobièrnu di Kòrsou a yega na e desishon ku ta nulifika e akuerdonan ku GZE. Esaki ta nesesario pa krea espasio mesora pa realisá un plan di kontingensha enbuska di un partner ku si por kumpli ku loke mester pa garantisá futuro di nos refineria. E bista ku e ‘due dilligence’ entregá dor di GZE mes a konfirmá, entre otro loke a sali na kla den e ‘due dillegene’ realisá pa Ernst & Young, demas informashonnan ku MDPT a kompilá, ku GZE tin su retonan, manera p.e. restrukturá e kompania, ku lo keda kla te na fin di 2018.

Pa Gobièrnu di Kòrsou, GZE, no a resultá e kompania ku por tuma e responsabilidat pa ópera i modernisá nos refineria konforme manera nan e presentá nan mes i palabra den e ‘Memorandum of Understanding, Heads of Agreement’ i supsekuentemente e ‘addendum’. Nulifikashon ta nifiká, ku debi na GZE su inkapasidat pa kumpli ku ponenshanan básiko ku nan a pinta di por kumpli kuné, gobièrnu ta konsiderá e akuerdonan no eksistente. Tempu no ta warda i fin di 2019 ta serka, komo tal Gobièrnu ta opta pa nulifika e akuerdo ku GZE i aselerá a proseso pa buska un alternativa ku si por kumpli i karga e responsabilidat pa futuro di nos refineria.

GZE no a resulta loke nan pretendé di ta

Ta resulta ku GZE, kontrario na loke a keda pintá na momentu ku a firma e MoU no tin e abilidat pa karga un proyekto grandi manera nos refineria. GZE no tin tampoko e sosten inkondishonal di gobièrnu Chines kontrario na loke tin pone den e MoU. Tur e dos puntonan aki tabata puntonan kardinal a base di kua Gobièrnu a firma e MoU ku GZE. Awor ta resultá, i esaki ta keda suprayá pa e ‘due diligence’ ku GZE mes a entrega, ku GZE, en bista di su situashon finansiero ke sera un konsorsio di kompania pa bin realisá modernisashon di nos refineria miéntras ku gobièrnu a sera akuerdo ku GZE i no ku un konsorsio deskonosí ku awor GZE ke sera i presentá. Es mas GZE den e MoU a hasi menshon di vários kompania di estado chines notabel ku nan ta huntu kuné den un konsorsio pero a resultá ku esaki no ta e kaso i a presentá otro instansha, di ménos renombre komo e partido ku mester perkurá pa e kapital.

 

 

SHARE

LEAVE A REPLY