WILLEMSTAD.- Sra. Shudelle Gijsbertha a tuma kontakto ku redakshon di EXTRA relashoná ku molèster di awa di kloaka.
Sra. Gijsbertha ta habitante di Cartagenastraat, e Sra ta un persona di edat ku ta den ròlstul i tambe e ta un pashènt ku ta dialisá.
Den e dianan tras di lomba e señora a kuminsá haña bastante molèster di awa di kloaka. E awa aki ta pasa nèt dilanti di su porta di kas i ta produsí un holó sumamente desagradabel. Na momentu ku e ta sali kas e ta hañ’e tin ku pasa ku su ròlstul den e awa shushi aki kual ta un situashon a-higiéniko.
E Señora a duna di konosé ku ayera e no por a drumi na su kas debí ku e holó ta hopi fuerte i esaki ta afektá su rosea.
Sra Gijsbertha ta hasi un supliká na OW pa laga remediá e situashon aki mas pronto ku ta posibel di forma ku e por regresá su kas bèk.
