PORT-AU-PRINCE, HAITI (AFP).- Un grupo di 200 polis mas a yega for di Kenia ayera pa forma parti di un mishon sostené pa Nashonnan Uní ku e meta pa trese bèk seguridat na Haiti. E pais karibense ta batí pa gèngnan ku ta terorisá rònt e pais.
“Tabatin kaba 200 polis keniano, kendenan a yega dia 25 di yüni último, i ayera a bin 200 mas”, segun gobiernu haitiano a bisa den un komunikado.
Pero, un funshonario di polis keniano a bisa ayera ku “e pais tin 600 polis na Haiti, ku ta inkluí e dosshen ku a biaha ayera nochi” pa e pais afrikano.
E di dos grupo a yega ayera mainta na Port-Au-Prince, risibí pa e direktor general nobo di polis haitiano, Rameau Normil, i e komandante di polis keniano na Haiti, Godfrey Otunge.
E pais afrikano a komprometé su mes pa manda 1.000 polis den kuadro dje mishon.
Haiti pa basta tempu kaba ta sufri violensia di gruponan armá ku ta kontrolá e 80% di Port-Au-Prince i prinsipal kareteranan dje pais.
Pero e situashon a bira mas serio na fin di febrüari último, ora ku e vários gèngnan a sera kabes pa ataká sitionan stratégiko dje kapital, entre kua wardanan di polis, prizònnan i e aeropuerto, retando e promé minister dje momento ei, Ariel Henry.
Henry a baha i a keda remplasá pa un grupo presidensial di transishon ku tin e tarea kompliká pa trese bèk seguridat den e pais i frena e krísis humanitario hopi grave provoká pa e violensia.
Kenia ta na kabes dje kontingente multinashonal na Haiti, ku mester yega na 2.500 efektivo konsistiendo di polisnan di otro paisnan manera Bangladesh, Benín, Chad, Bahamas i Barbados.
E mishon, na prinsipio pa durashon di un aña, tin komo meta pa yuda polis haitiano den su operashonnan kontra di gèngnan, ademas di garantisá seguridat di infrastruktura i permití pa sivilnan por move sin opstákulo komo tambe pa sigurá e yudansa humanitario”, segun un resolushon di Konseho di Seguridat di Nashonnan Uní.
