PORT-AU-PRINCE, AP.- Medionan di komunikashon na Haiti a pidi polis pa protehá nan i proveé un espasio pa nan traha, despues ku un reportero di radio a wòrdu asesiná. Vários periodista mas a wòrdu ataká.
Un persona deskonosí a tira periodista Rospide Petion vários biaha na momentu ku e tabata yegando kas den un outo, propiedat di radio Sans Fin. E reportero di 45 aña, kende tabata kasa ku tres yu, a kaba di finalisá un programa kaminda el a papia tokante e akusashonnan di korupshon kontra e gobièrnu di presidente Jovenel Moise.
Moise a bisa den un komunikado djamars ku e asesinato tabata un “akto di odio” ku ta afektá prensa haitiano.
Un fotógrafo di Le Nouvelliste a wòrdu heridá ku un bala di rùber i e manifestantenan a purba ataká un videografo di Radio Television Nationale D’Haiti. Vários reportero di Radio Tele Ginen a wòrdu piedra i nan outo a wòrdu destruí djaluna.
Organisashonnan di prensa a pidi e pueblo pa stòp di ataká e reporteronan.
“Prensa tei pa informá nos, den tur klase di situashon”, asina nan a bisa den un komunikado. Tur hende ta liber pa skohe e medio ku nan ta preferá, asina e komunikado a agregá.
