PORT-AU-PRINCE, AP.- E presidente haitiano Jovenel Moïse a kibra silensio i a bira ku ta un akto iresponsabel pa e renunsiá miéntras e pais ta drentando den su di sinku siman di protesta diario, kual a paralisá Haiti su ekonomia.

Moïse a bisa den un konferensia di prensa sorpresivo ku el a wòrdu skohé di forma konstitushonal i ku e lo renunsiá solamente atraves di un proseso legal, manera por ehèmpel elekshon nobo.

E presidente a bisa ku e ta dispuesto na negoshá pa haña un solushon pasífiko pa e krísis, i a agregá ku oposishon mester aseptá e kombersashonnan pa sera un akuerdo ku su gobièrnu.

“Sin importá kon largu esaki dura, mi ta dispuesto pa tene un diálogo. Nos no kier bolbe eksperensiá un aña 1986 mas”, asina Moïse a bisa refiriendo na e aña kaminda presidente Jean-Claude Duvalier a hui di Haiti despues di manifestashonnan kontra su régimen.

Durante su diskurso, Moïse a bisa ku Haiti ta “pió” ku entre 2014 i 2015, e añanan ku a sigui despues ku a kita presidente Jean-Bertrand Aristide di su puesto.

E lidernan opositor a rechasá Moïse su oferta di diálogo. Nan a indiká ku e proposishon aki no ta “kreibel” i a pidi pa sigui protestá riba kareteranan di Haiti pa fòrs’é renunsiá.

Por lo ménos 20 persona a muri i mas di 200 a resultá heridá desde ku e protesta a kuminsá.

 

LAGA UN KOMENTARIO

Please enter your comment!
Please enter your name here