HAITI, AP.- Orkan Matthew a kaba ku kas di Sonette Crownai den un pueblo na kosta di Haiti i kólera a bai ku su beibi. E muhé aki di 25 aña ku ta traha den un marshe, huntu ku su famia ainda tabata kontando tur loke nan a pèrdè ora el a ripará ku Peter James su beibi di 10 luna tabatin síntomanan di un enfermedat ku outoridatnan sanitario tabata teme ku ta bin despues di e tormenta.
“Mi a wak e síntomanan i mi a haña sa kiko tabata pasando i mi a spanta”, asina Crownai a bisa kende a bai ku su beibi den brasa pa e sentro di tratamentu di kólera na Les Cayes kaminda tabatin 20 hende tira riba kamanan bou di un dak di metal miéntras un fèn tabata trata na saka e kalor tropikal.
Kólera ta kousa pa un bakteria ku ta produsí un diarea severo i esaki a pega ora bebe awa kontaminá òf kome kuminda kontaminá. E por provoká morto rápidamente, despues di un agonia fuerte, komo konsekuensia di deshidratashon total. Pero por trat’é fásilmente si e keda detektá na tempu.
E destrukshon ku e tormenta kategoria 4 a kousa a krea kondishonnan ideal pa propagashon di e enfermedat atraves di awa. E riunan a desbordá den e region aki, kreando espasio pa e bakteria biba aden. E awa kontaminá a yega te e posnan di awa di bebe ku a sobrebibí e orkan.
Míles di persona ku nan kas a keda destruí ta kedando ku famia i amigunan den espasionan chikí loke tambe ta hasi mas fásil ainda e kontagio. ya tin indikashonnan ku e malu ta plamando. E organisashon mundial di salu a bisa ku tin informashon di por lo ménos 200 presunto kaso di kólera den e region despues ku Matthew a pasa.
