WILLEMSTAD.- Dia 14 i 15 di febrüari próksimo e evento di karnaval ku a bin ta krese seriamente ta selebrá su di 5 edishon den Curaçao Festival Center. No tin duda ku HAK’E Curaçao Jump in festival definitivamente ta un evento kaminda henter e komunidat karnavalesko ta pendiente di dje.
Selebrando su promé lustro den 2020 HAK’E durante su rueda di prensa a duna informashon di kiko tur nos por spera e aña aki. Huntu ku nan partner prinsipal “Volkswagen Curacao” i tambe nan partner nan “Nagico Insurances i Amstel Bright” HAK’E lo sòru pa trese un fin di siman karga ku ambiente, músika i entretenimentu. Huntu ku esakinan nos ta orguyoso di por yama bon bini na un partner mas ku a duna nos e konfiansa pa organisá e evento di HAK’E na un nivel aun mas haltu; pa esaki nos ke yama “Changes” bon bini pa forma parti di e famia di HAK’E, segun e bosero di HAK’E CJIF.
Aña pasa pa promé biaha HAK’E a organisá un di dos dia ku tabata riba djabièrnè kaminda a duna Homenahe na Tumba. Esaki a resultá un éksito rotundo i a sòru pa e aña aki tambe HAK’E lo ta e esenario pa duna Homenahe na Tumba. Ku artista nan manera Doña Mistica Stefania, Ultiminio “Spiritu di Algeria” Gonzalez, Mr. Saab, Reinier “Reintje Rock” Lijfrock, Rei òf Reina di Tumba 2020, respaldá pa agrupashon musikal manera ERA, RCO (Randal Corsen Orchestra), Happy Peantus i GENTZ ta garantia sigur ku djabièrnè dia 14 di febrüari 2020 lo ta unu super elektrisante.
Lo ta e di 5 aña ku e di dos dia lo wòrdu organisá. Djasabra dia 15 di Febrüari un biaha mas HAK’E lo ta esenario pa nos ménos ku 9 agrupashon musikal i un kantidat di artistanan invitá ku lo kompartí 3 diferente esenario durante un eksploshon di músika di roadfire, tumba i algun sorpresa mas.
Kombiná esaki ku sierto áreanan ku lo wòrdu konstruí pa e selebrashon di 5 aña HAK’E lo ta e plataforma pa selebrá nos karnaval. Agrupashonnan manera Tune, One Flavaz, Highway Band, Score, Dolce, Era, Gio, Icons huntu ku tur artistanan invitá ta ingredientenan  pa un ambiente sin igual. Kombiná esakinan ku DJ Ro-1 i tambe MC Chris Strick bo sa ku HAK’E ta un Festival ku bo no por pèrdè.
Den un selebrashon mester tin regalo i pa esaki HAK’E i Volkswagen Curaçao un biaha mas ta duna bo e oportunidat di sali riba djasabra dia 15 di Febrüari 2020 komo e ganadó apsoluto di un Volkswagen TCross 2020.
Kumprando bo karchi pa HAK’E i ta presente den Festival Center riba djasabra 15 di Febrüari 2020, abo por ta ganadó di e outo aki. Ainda no ta kla; Nagico Insurance e partner ofisial di seguro di HAK’E a sòru pa e outo ta sigurá. HAK’E huntu ku Volkswagen Curaçao i Nagico Insurance un biaha mas ta mustra ku no solamente nan ta sostené nos artistanan lokal pero tambe ta balorá abo komo fanátiko di HAK’E Curaçao Jump In Festival i pa esaki ta duna bo chèns di gana un outo nobo nobo ku su seguro inkluí*. (*sigui reglanan di kampaña).
Volkswagen Curaçao, Nagico Insurances, Amstel Bright, Changes, Massive Productions, Coca Cola i Estreno mas Pikete ta orguyoso di por organisá e wikènt di HAK’E Curaçao Jump In festival dia 14 i 15 di Febrüari 2020.
Entrante 17 di yanüari 2020 karchinan lo ta na benta serka miembronan di Estreno Mas Pikete.
Sigui tur medionan di komunikashon i tambe e página di Facebook @hakecuracao pa bo keda na altura di tur desaroyo di e Festival karnavalesko ku lo selebrá su promé lustro den un manera ekstraordinario.

LAGA UN KOMENTARIO

Please enter your comment!
Please enter your name here