‘Hamas mi a bisa ku ta bai manda maestronan kas o baha nan salario’

...Minister Marilyn Alcalá-Wallé...

WILLEMSTAD. – Den un komunikado emití pa prensa Minister di Enseñansa, sra. Marilyn Alcalá-Wallé duna di konose ku Hamas mi a bisa ku ta bai manda maestronan kas o baha nan salario.

Resientemente Minister di e.o. Enseñansa, sra. Alcalá-Wallé a manda un karta pa tur e direktivanan di skol, e fundashonnan, sindikato i personal di e Ministerio di Enseñansa, Siensia, Kultura i Deporte, den kua e mandatario a splika e situashon finansiero di pais kaminda ku e College Financieel Toezicht (Cft) tambe a ekspresá su preokupashonnan pa e situashon finansiero di pais.

Dia 15 di aprel último  2019, e presidente di Cft sr.  Prof. dr. R.H.J.M. Gradus a informá Minister di Finansas sr. Kenneth Gijsbertha ku e presupuesto di 2019 ta sera ku un defisit grandi di fl. 112 mion florin i ku ainda mester kubri e defisitnan di 2017 i 2018. Alabes sr. Gradus a informá ku Cft no ta mira ku riba término kòrtiku Gobièrnu ta solushonando e reto aki. Pues e presupuesto no ta kumpli ku e normanan di e Rijkswet financieel toezicht (Rft).

P’esei Cft a aserká Rijksministerraad (RMR) i a konsehá RMR pa duna Kòrsou un instrukshon pa instruí Gobièrnu di Kòrsou pa su presupuesto di 2019 sera sin defisit i tuma medidanan pa sanea e situashon finansiero.

Si un instrukshon bini di Hulanda pa sera e presupuesto di 2019 sin defisit, esaki ta nifiká un situashon indeseá pa e sektor di Enseñansa, Siensia, Kultura i Deporte, ya ku gran mayoria di gastu den e sektor aki ta kubri salarionan na direktivanan di skol i fundashonnan ku gobièrnu ta supsidiá. Pues e situashon di instrukshon aki no ta deseabel.

Den e kuadro aki Minister Alcalá-Wallé a pensa riba otro alternativanan pa yuda baha e defisit riba presupuesto. E trajekto aki ta eksigí pa tur instansha yuda pensa, hisa produktividat kaminda por i traha huntu pa yega na solushon duradero.

Riba e imagen abou un i tur por haña un bista di e presupuesto di e Ministerio di Enseñansa, Siensia, Kultura i Deporte. Den e presupuesto por tuma nota alabes ku a tene kuenta ku un suma di 10 mion florin ADISHONAL pa kumpli ku e Convenant ku a sera ku e sindikato SITEK.

SHARE

LEAVE A REPLY