JERUZALEM (AFP).- Hamas a atvertí ku apesar di e asesinato di su lider Yahya Sinwar, ku ta un gòlpi duru kontra dje movementu islamita palestino, ku nan lo no liberá e rehennan ku ta den nan poder te ora ku Israel pone fin na e guera den Gaza.
Hamas, movementu islamita palestino ku ta goberná Gaza for di 2007 i ku ta hopi debilitá despues di mas di un aña di guera ku Israel, ayera a konfirmá e morto di su lider, konsiderá e ‘brain’ dje atake di 7 di òktober 2023 riba suela israelí.
E dia ei, milisianonan islamita a mata 1.206 persona den Israel, mayoria ta sivilnan, i a sekuestrá 251, di kua 97 ta sigui komo rehen.
E movementu palestino a sigurá ku e morto di Sinward lo “reforsá” e grupo i a atvertí ku lo no liberá e rehennan te ora ku Israel pone fin na e guera den Gaza.
Di su parti, e Organisashon pa Liberashon di Palestina (OLP) a hasi un yamada pa “unidat” dje diferente frakshonnan palestino.
E promé minister israelí, Benjamin Netanyahu, a bisa na víspera ku e morto di Sinwar ta marka “e prinsipio dje fin” di e guera den Gaza i vários lider estranhero a kompartí e speransa ku e ta habri kaminda pa stòp ku e guera.
E presidente norteamerikano, Joe Biden, a konsiderá ku morto di Sinward ta “un oportunidat pa buska e kaminda di pas” den Medio Oriente.
Mas despues, den un deklarashon konhunto despues di a reuní na Berlin, Biden i e dirigentenan aleman, britániko i franses a señalá “e nesesidat inmediato pa debolbé e rehennan israelí na nan famianan, para e guera den Gaza i sòru pa yudansa humanitario yega serka e sivilnan.
E guera no a stòp
Den Gaza tin poko speransa ku e asesinato di Sinwar ta pone un fin na e guera.
“Semper nos a pensa ku ora yega e momento ei e guera lo stòp i nos bida lo regresá na normalidat”, segun e gazatí Abu Mendi, di 21 aña di edat.
“Pero e guera no a para i e matansanan ta sigui”, el a agregá. Israel djabièrnè a sigui bombardiá Gaza, ku vários atake durante oranan di anochi i mainta trempan, segun un periodista di AFP.
Ehérsito israelí a anunsiá ku su operashonnan ta sigui den Jabaliya, den nort dje teritorio, kaminda Hamas ta purba na kue forsa bèk.
Por lo menor 42.500 palestino, den su mayoria sivilnan, a muri for di inisio dje ofensiva Israel den Gaza mas di un aña pasá.
