NAGANO, HAPON, AP.- Ekiponan di reskate a sigui buska mas víktima entre lodo i riunan ku a yena ku awa despues di un tifon ku a laga diferente morto fin di siman. E tifon a kousa daño den sentro i na nort di Hapon.
E tifon, Hagibis, a kousa tormento severo i bientu djasabra, lagando míles di kas riba e isla prinsipal di Hapon inundá. E isla no tabatin koriente i a wòrdu afektá ku dañonan severo.
Un sekshon di riu Nagano, na nortwèst di Tokyo tabata kompletamente kubri ku lodo. E agensia di notisia Kyodo a reportá por lo ménos 48 morto debí na e tifon, aparte di 17 persona pèrdí i kasi 100 herida.
Agensia di Maneho di Kandela i Desaster, kual generalmente ta mas kouteloso ku evaluashon di víktimanan a indiká ku 24 persona a muri i nuebe ta pèrdí.
Ekspertonan a señalá ku mester di tempu pa evaluá magnitut di e daño i ku e kantidat di víktimanan ta oumentá diariamente. Hagibis a kousa un kantidat rekòr di áwaseru na algu sitio, segun indikashon di meteorologonan. Prefektura di Kanagawa, na sùitwèst di Tokyo a haña 1 meter di awa den 48 ora.
