Prínsipe hapones Hisahito, yu di prínsipe Akishino i prinsesa Kiko ta pone flor na Cenotaph pa honra víktimanan di bombardeo di Huroshima
TOKIO, HAPON, AFP.- No poseé, no produsí i no permití entrada di armanan nuklear. Pa dékadanan, e tres prinsipionan aki tabata práktikamente intokabel na Hapon. Pero hustamente den dianan ku e pais ta konmemorá e bombardeonan atómiko di Hiroshima i Nagasaki na 1945, dirigentenan hapones ta kuminsá kibra e tabú.
Konstitushon di Hapon ta renunsiá na mantené un poder militar ofensivo, i diferente gobièrnunan for di final di Segundo Guera Mundial a respetá e kompromiso tripel tokante armanan nuklear.
Pero e postura akí ta kuminsá ta ser kuestioná debí na progreso militar di paisnan bisiña manera China, i duda kresiente tokante kon konfiabel Merka ta garantisando seguridat di Hapon.
Djaweps último, durante konmemorashon di e bombardeo di Hiroshima, Promé Minister, Sanae Takaichi, a rechasá di klarifiká si e ta pensa pa kambia polítika nuklear di Hapon.
Su minister di Defensa, Shinjiro Koizumi, resientemente a pidi pa tin “un diskushon sin tabú”.
Un alto funshonario di su atministrashon, durante un reunion será ku medionan lokal, a defendé e idea ku Hapon mester tin su mes armanan nuklear.
“Mi no por evitá di pensa ku kisas realmente e ke kambia” e kompromiso di Hapon ku polítika antinuklear, Satoshi Tanaka, di 82 aña, a deklará na AFP.
Tanaka ta un aktivista ku a sobrebibí e atake atómiko riba Hiroshima na 1945.
Hapon a konmemorá djaweps e 81 aniversario di bombardeo di Hiroshima, miéntras djadumingu tabata turno pa konmemorá e bombardeo di Nagasaki.
