TOKIO, P.- Promé minister hapones Shinzo Abe a probechá ayera un reunion ku su kolega di Singapur pa promové e teknologia hapones di trein bala Shinkansen, komo parti di e plannan pa konstruí un trein di velosidat haltu ku ta uni Singapur i Malasia.
Abe, den kalidat di bendedó di treinnan Shinkansen a reuní ku Lee Hsien den su kas pa bishitante, reservá pa duna hospitalidat na nivel haltu, en bes di hasié den su ofisina manera sa hasi regularmente. Hapones ta kompitiendo pa haña kontraktnan di un trein ku ta planeá pa uni Singapur i e kapital di Malasia, Kuala Lumpur. Abe a bisa Lee ku e tin bastante espektativa pa Singapur skohe Shinkansen komo e símbolo di kooperashon entre e dos paisnan. Lee a papia hopi bon di e rèkòrt di seguridat di Shinkansen.
“E rèkòrt ekstenso di seguridat di Shinkansen, su viabilidat i ekselensia ta sirbi bon na e kompetensia di kontraktnan, asina el a bisa. Singapur ke skohe e mihó sistema di trein atraves di un proseso di selekshon transparente i ophetivo, asina el a agregá.
E lidernan tambe a bai di akuerdo pa kooperá pa pone un akuerdo transpasífiko di kooperashon ekonómiko kana. Tur dos pais awor ta parti di un akuerdo di 12 nashon. E gobièrnu hapones ta tratando pa parlamento apoyá e akuerdo pa fin di novèmber.
