WILLEMSTAD.- E fandanga rondó di e kompania Oryx i plannan pa inisiá ku almasená i meskla produkto, a resultá al final ku e kompania mester sondia merkado promé ku inisiá. Nada a bin afó te ainda. “Representantenan di e kompania no ta ni na Kòrsou mas. E frakaso akí tabata di spera”, èks sindikalista i trahadó di refineria, Hensley Harms, ta deklará pa EXTRA.
E ta sigui duna di konosé ku bou di gerensia anterior di Refineria di Kòrsou (RdK) tabatin un plan similar pa RdK almasená i meskla produkto riba mesa pero a bai kontra e plan akí pa despues a bai purba pa hasi mesun kos tòg via un terser. “Loke a resultá ta ku e kompania ku a buska pa hasi e aktividatnan akí, Oryx, a disidí ku ta sinta wak i sondia merkado promé.”
Meskos ku e plannan pa start planta di asfalt ta kosta sèn, Harms ta bisa ku pa almasená i meskla produkto tambe ta rekerí invershon promé ku por inisiá. E ta lamentá ku te ainda polítika no ta duna kara ku den e kuadro akí tampoko nada ta pasando.
“Atrobe sindikatonan ta laga di deseá i no ta tende nada di nan. Tur kos ta tuma lugá tras di porta sera. A pone proseso pa rafiná krudo un banda i ta di wak ta kiko eksaktamente lo sali for di aktividatnan pa meskla produkto. E realidat ta ku e situashon rondó di refineria ta sigui dura mas i mas i no ta importá kiko bini pasobra ta e mesun situashon ta sigui kaminda ta manipulá ku informashon i komunidat ta keda karga ilushon, miéntras ku un grupito ta sigui probechá di e tiki rekursonan ku a sobra den RdK.”
Harms ta sigui bisa ku loke ta pasando na Refineria Isla ta un abusu kontra trahadónan. Trahadónan di otro sektor ta haña trabou i gana mas sèn ku e trahadónan profeshonal di refineria. “Tur hende ta na soño, inkluso trahadónan miéntras ku sindikatonan tampoko ta krítiko riba e asuntunan akí.”
Na su opinion e yu di Kòrsou ta kontra di su mes. “Nos mes a permití pa laga e promesanan falsu akí dominá kiko e vishon realístiko mester ta pa refineria. Ta den kampaña i tur hende ta krusa man atrobe warda wak kiko ta bai pasa, miéntras pais ta sigui bai atras pasobra nada no ta kambia.”
E ta señalá ku ta mesun kos a pasa alabes ku e kompania CPR, ku a skohe komo ‘preferred bidder’ kaminda asta kaso di falsifikashon di dokumento a bin dilanti. “Tabatin hopi kos ku a bin dilanti den parlamento pero nada konkreto a sali afó. Ta hopi despues parlamento a eksigí investigashon.”
Pa Harms parlamento tampoko tabata serio den investigá kiko a pasa realmente. E ta lamentá kon polítikonan ta manipulá, “parti aki i aya algu, tira santu den wowo di hende, pero konkretamente no ta hasi nada.”
Foto:
…Hensley Harms…
