ROYAL OAK, USA.- Kamala Harris ayera tabata frei ku e republikanonan moderá miéntras ku Donald Trump tabata den e zonanan devastá pa orkan Helene den North Carolina.
Den e shete estadonan klave pa e elekshon presidensial (Pennsylvania, Michigan, Wisconsin, North Carolina, Arizona, Nevada i Georgia) e último enkuestanan publiká ayera pa New York Times tabata mustra e rivalnan skouder na skouder. E mesun kos ta konta pa e enkuesta realisá pa Washington Post: 47% tin intenshon di vota pa Harris i mes kantidat pa Trump.
Den e situashon ei, kada un dje kandidatonan tin ku manehá e strès manera e por.
“Ultimo tempu mi ta spièrta i ta hasi ehersisio pasobra esei ta importante pa mente, kurpa i espíritu. “Mi ta kome bon i mi ta sigurá di papia ku e muchanan i mi kasá tur dia”, segun e vise presidente i kandidata demokrat pa White House a bisa na Michigan.
Harris, di 60 aña, a biaha pa e dos estadonan ost dje pais, Pennsylvania i Wisconsin, kompaña pa e eks-kongresista republikano Liz Cheney, un atversario di Trump.
“No ta trata di partido, sino di kiko ta bon i kiko ta malu”, segun Cheney kende ta motivá e hendenan pa “vota di forma konsiente”.
Harris ayera a konsentrá pa buska e voto di republikanonan moderá. El a bisa nan pa pone atenshon na tur loke Trump ta papia pasobra “e no ta un hende serio, pero e konsekuensianan si e ta presidente di Merka lo ta brutalmente serio. “Tin kosnan ku e ta bisa ku chiste i harimentu, pero ta palabranan ku tin nifikashon…inkluso den polítika eksterior”.
“Si Donald Trump bira presidente, Vladimir Putin (e mandatario ruso) lo bai sinta na Kiev pasobra Trump ta laga su mes keda manipulá pa fabornan”, segun Harris
“Trump ta bisa ku e presidente di Rusia por hasi loke e ke, invadiendo Ukrania. “Mira e mapa, Polonia lo ta e siguiente”, Harris a sigui bisa.
Siman pasá e mionario Trump a laga tur hende ku boka habrí ku vários komentario grosero, entre otro ku el a menshoná e “pénis inkreibel” dje fayesido golfista Arnold Palmer i a yama Harris “visepresidente di mièrdè”.
Despues di a purba sedusí obreronan djasabra i hasa batata djadumingu den un McDonald’s, e magnate di 78 aña a sigui rumbo pa North Carolina.
Den e estado aki batí pa e orkan Helene el a ripití teorianan di konspirashon ku ta akusá e gobièrnu di Joe Biden i e Agensia Federal pa Maneho di Emergensia di ta usa fondonan pa kasonan di desaster pa trese migrantenan ilegal i reforsá votonan demokrat.
El a akusá e vise presidente ku “tur dia e ta trese migrantenan ilegal ku ta violando i asesinando muhé i muchanan”.
Realidat ta ku delinkuensia nashonal a baha, segun sifranan ofisial, i e kantidat di krímen atribuí na migrantenan ta hopi abou.
