DETROIT, USA (AFP).-Kamala Harris i Donald Trump a intensifiká nan kampaña ayera den e estadonan klave den un intento pa akumulá mas voto na dos dia di un elekshon presidensial hopi pèrta na Merka.
E último enkuesta di New York Times/Siena a mustra algun kambio den e estadonan den disputa, pero ta sigui papia di un empate tékniko, denter di márgen di eror.
Djasabra un enkuesta hopi pèrtá den Iowa a duna e vise presidente demokrat Kamala Harris tres punto dilanti dje eks-presidente republikano Donald Trump, siendo Iowa un dje estadonan ku Trump a gana den 2016 i den 2020.
“Ta mi enemigunan a hasi e enkuesta”, segun Trump a keha ayera den un presentashon an Pennsylvania. “E enkuestanan ta hopi korupto”, segun el a agregá.
E estado ei ta un di esnan mas kudishá dje shete estadonan ku ta flota, pues estadonan ku no sin mas ta ku Partido Republikano ni Partido Demokrat.
Den e dos estadonan aki e yabinan pa White House por keda lográ pa djis algun desena di míles di voto.
Na Pennsylvania, kaminda tin algun shen mil puertorikeño ta biba, Trump lo por sinti e konsekuensia dje komentario di un humorista kende den un enkuentro di kampaña di Trump a referí na e isla komo “isla flotante di shushi’.
“Mi ta kompetí kontra di un persona totalmente korupto, den realidat mi no ta kompetí kontr’i dje, mi ta kompetí kontra di un mashin korupto yamá Partido Demokrat, un partido totalmente korupto”, segun Trump a bisa ayera.
“Lo mi kaba ku inflashon, lo mi para e invashon di un kantidat grandi di kriminalnan ku ta drenta nos pais”, el a primintí refiriendo na migrantenan den situashon iregular.
E kandidato republikano tambe lo bai North Carolina, ku ya el a bishitá 2x, i Georgia. Te ku ayera, mas di 76 mion persona ya a emití nan voto.
