WASHINGTON, USA.- E demokrat Kamala Harris a akusá Donald Trump di ta buska “un poder sin kontròl”, despues di supuesto elogionan ku e republikano a hasi algun aña’tras na direkshon di Adolf Hitler.
E kandidatonan ta hisa tono ora ku falta ménos ku dos siman pa e elekshon i esei na momento ku e enkuestanan ta sigui mustra un empate.
“Ta profundamente preokupante i inkreiblemente peligroso ku Donald Trump ta elogiá Adolf Hitler, e hòmber ku tabata responsabel pa morto di seis mion hudiu i di algun shen mil norteamerikano”, segun e vise presidente demokrat. “Tur esaki ta un prueba mas pa e pueblo norteamerikano di ken realmente ta Donald Trump”, Harris a bisa refiriendo na su rival republikano.
“E eks presidenete Donald Trump ta kada bes mas peligroso i no stabil, i den un di dos mandato, personanan manera John Kelly lo no tei pa salb’é kontra di su tendensia i akshonnan”, segun Harris refiriendo na e eks hefe di gabinete dje magnate durante di su mandato.
“Pues e konklushon ta: nos sa e lokual Donald Trump ta deseá. E ta deseá un poder sin kontròl”, Harris a bisa.
Sitando un deklarashon di Kelly na The Atlantic i New York Times, Harris a bisa ku Trump “a deseá di tabatin generalnan manera esnan di Adolf Hitler”.
“Donald Trump a bisa esei pa motibu di no ta deseá un ehérsito ku lo ta leal na Konstitushon di Merka”, segun Harris. “E ta deseá di tin un ehérsito ku ta leal na su persona”.
E eks general di marina John Kelly a konfirmá djamars último ku e magnate su sistema ta kuadra ku e definishon di fasista.
“Di mes e eks presidente ta den e área di ekstremo derecha, di mes ku e ta outoritario, e ta atmirá personanan ku ta diktador, e mes a bisa esei. “Pues sin duda e ta kuadra den e definishon general di fasista”, segun Harris.
Kelly tambe a bisa ku Trump “a komentá mas ku un biaha: “bo sa, Hitler a hasi kosnan bon tambe”.
Algun deklarashon di su parti riba migrashon ilegal ya ta bal e komparashonnan ku Hitler.
“Inmigrantenan ta venená sanger di e pais”, segun el a bisa vários biaha den último lunanan. Ademas el a usa términonan di “enemigu interior” i “mal rasa”.
Propaganda nazi tabata referí na hudiunan komo “mal rasa”, papiando di forma denigrante riba hudiunan.
