WASHINGTON, USA.- Kamala Harris den entrevista ku Fox News a bisa di lo hiba un otro tipo di maneho kompará ku gobièrnu di Joe Biden den entrevista riba migrashon i a purba na aserká e republikanonan moderá.
E entrevista di e vise presidente i kandidato demokrat pa White House tabata unu poko difísil ku e entrevistadó Bret Baier, un veterano periodista di e kadena preferí pa e konservadornan.
“Bo mester laga mi kaba di papia”, segun Harris a bisa vários biaha, ora ku el a keda puntrá pe kantidat di migrantenan den situashon iregular.
E presentador, ku fama di ta duru pero hustu, ker a sa si Harris ta arepentí di a pone fin na e programa “Quedate en Mexico”, introdusí pa e eks-presidente Trump durante di esaki su mandato pa e migrantenan warda riba resultado dje proseso migratorio na e otro banda di frontera,
E eks fiskal di 59 aña a insistí ku e sistema migratorio “ta kibrá” i a akusá Trump di ta pone opstákulonan pa regl’é, dor di blòkia un proyekto di lei bipartidista.
E periodista a destaká ku e migrantenan liberá sperando kaso migratorio a kometé krímennan serio i a ilustrá esei ku video di e mama di un mucha muhé asesiná.
“Ta kasonan trágiko, no tin duda i mi no por ni imaginá e doló ku e famianan dje víktimanan a pasa’den pa un pèrdida ku no mester a tuma lugá. “Pero tambe ta bèrdat ku si nuebe luna pasá a aprobá un seguridat na frontera, nos lo tin mas agente einan”, segun Kamala Harris a defendé su mes.
Generashon nobo
Ora ku a puntra Harris pakiko el a bisa den otro entrevistanan ku e no ta pensa nada ku lo e hasi den forma diferente kompará ku Biden, el a kontestá: “Mi presidensia lo no ta un kontinuashon di esun di Biden.
“Lo mi aportá ku eksperensianan vital, mi eksperensianan profeshonal i ideanan fresku i nobo. Mi ta representá un generashon nobo di liderazgo”, segun al a agregá.
