DOUGLAS, USA.- Kamala Harris ayera a yega na frontera di Merka ku México pa papia riba migrashon, un tema ku su rival Donald Trump ta usa komo linia di atake den su pelea pa drenta White House.
E vise presidente a yega Arizona, un dje estadonan klave den e elekshon di 5 di novèmber. Ta trata di su promé biahe pa e frontera den su kampaña elektoral ku a start den yüli, ora ku el a remplasá presidente Joe Biden komo kandidato demokrat.
Den su diskurso na e frontera, Harris mester amplia riba su promesa di medidanan di seguridat mas severo na e frontera zùit dje pais, ku desaroyo di un sistema humanitario di migrashon.
“E pueblo norteamerikano ta meresé un presidente ku ta preokupá mas tantu pa e seguridat na frontera en bes di hunga weganan apolítiko”, segun Harris a trese dilanti.
Trump a sentra su kampaña den un plataforma anti-inmigrashon, primintiendo deportashon masivo, ku akusashon falsu ku inmigrantenan ta kome maskotanan di norteamerikano i promoviendo un retórika negativo riba presensia di inmigrantenan den Merka.
Ayera, e diputado republikano Tony Gonzalez a referí na sifranan di Departamento di Seguridat Nashonal segun kua aktualmente tin den e pais 425.000 estranhero ku antesedentenan penal, inkluso 13.000 kondená pa homisidio.
Trump a probechá dje informe pa ataká su rival, afirmando sin prueba ku ta trata d personanan ku durante di último añanan a krusa frontera di forma ilegal bou di mandato di Biden i Harris. “Nan ta kanando den nos kayanan”, segun Trump.
Estadístikanan, sinembargo, no ta detayá for di ki tempu e personanan aki ta den Merka, i segun ekspertonan, inkluso por ta trata di dékadanan.
“Ta trata di personanan ku , prinsipalmente, ya a keda akusá i kondená i a kumpli ku nan kondena”, segun Aaron Reichlin-Melnick, dje entidat no gubernamental Organisashon Norteamerikano di Inmigrashon.
