Prestigioso Harvard University por bira e siguiente instituto di enseñansa pa subi ‘blacklist’ di presidente Donald Trump.
NEW YORK (AFP).- Gobièrnu di Donald Trump a anunsiá di lo revisá e finansiamentu di 9.000 mion dòler na Harvard University pa supuesto “antisemitismo” den e ‘campus’, ku ta den liña ku medida anunsiá kontra di Columbia University.
E presidente republikano a start un atake kontra di universidatnan prestigio di Merka di kua den nan ‘campus’ a tuma lugá protestanan kontra e guera di Israel kontra di Hamas den Gaza. E medida ta enserá kòrtamentu di finansa federal i deportashon di studiantenan estranhero ku a tuma parti den e akshonnan.,
Mas di 300 studiante a mira ku a revoká nan visa, segun sekretario di estado Marco Rubio.
Awor akí tin duda riba e 255.6 mion dòler di kontrakt entre Harvard i gobièrnu, komo tambe e finansa di 8.700 mion dòler na e institushon di Ivy League.
Krítikonan ta mira e medidanan di gobièrnu norteamerikano komo un intenshon di mishi ku libertat di ekspreshon i manifestashon, miéntras ku su defensornan ta señalá ku e medidanan ta nesesario pa restourá òrdu den ‘campus’ i protehá studiantenan hudiu.
Pa e sekretario di Edukashon, Linda McMahon, “e frakaso di Harvard pa protehá e studiantenan, den e ‘campus’, e diskriminashon antisemita – miéntras ku ta promové otro i ideologianan – a trese su reputashon den peliger grave”.
“Harvard por koregí e erornan aki i bolbe yega na un ‘campus’ dediká na e ekselensia akadémiko i pa buska e bèrdat, den kua tur studiante ta sinti nan mes sigur den e ‘campus’”, segun el a agregá.
Den febrüari, Harvard a keda inkluí riba un lista di10 universidat, den kua tambe ta figurá Columbia, ku lo keda di ‘screen’ dor di un grupo di trabou antisemitismo, kreá pa e gobiernu di Trump.
Columbia University ya a sufri un rekorte di 400 mion dòler den sosten federal.
Mas aleu, un dje lidernan di protestanan pro palestino, Mahmoud Khalil, a keda detené i ta lucha kontra di su deportashon apesar ku e tin residensia permanente na Merka.
