Profesornan i studiantenan di Harvard University a bin ta protestá pa medidanan di Donald Trump kontra dje universidat. Ayera a universidat a gana kaso den korte i gobièrnu di Trump tin ku hinka plaka den e universidat manera a bin ta sosodé pa dékadanan largu.
NEW YORK (AFP).- Un wes federal di Merka a revoká e kongelashon di fondonan ordená pa e gobièrnu di Donald Trump relashoná ku Harvard University. Un viktoria pa e institushon akí, kombertí den e símbolo dje krusada dje presidente kontra di algun sentro di edukashon superior.
For di momento di su regreso den White House, den yanüari, Trump a akusá e prestigioso universidat norteamerikano di ta pará na fabor dje ideologia “woke”, un término negativo di derecha pa referí na polítika ku ta rekonosé i fomentá diversidat. Tambe ta akusá e universidat di no ta protehá su studiantenan hudiu i israelí di forma adekuá durante di protestanan den e ‘campus’ ku tabata eksigí pa stòp ku e guera den Gaza. Komo represaya, e gobièrnu dje republikano a para poko mas ku 2.600 mion dòler di sosten federal na Harvard, inkluso e inyekshon destiná pa sektor di salú i a revoká e sertifikashon den e sistema Sevis, mediante kua ta outorisá estranheronan pa studia na Merka.
“E tribunal ta revoká i anulá” e desishonnan di gobièrnu konsiderando esakinan un “violashon dje Promé Enmienda” di konstitushon, segun e wes referiendo na e órdennan emití kuminsando 14 di aprel di 2025. Den su veredikto, Burroughs a konsiderá ku e kòrtamentu di fondonan gubernamental tin masha poko di aber ku e antesemitismo den e ‘campus’ ku e propio Harvard a rekonosé. “Ta bon kla, inkluso basando únikamente riba e propio atmishonnan di Harvard, ku e universidat den último añanan a haña su mes afektá pa antisemitismo i por a atendé e problema di otro manera”, segun el a skirbi.
E wes, nombrá pa e èks-presidente demokrat, Barack Obama, a bisa mas aleu ku e parehanan ku el a mira ta sugerí ku Trump “a usa e antisemitismo komo un kortina di huma pa un atake selektivo i ideológiko kontra e prinsipal universidatnan dje pais”.
E desishon hudisial akí ainda por keda apelá. E bataya legal ku Harvard, ubiká serka di Boston, por sirbi komo referensia pa otro institushonnan di edukashon superior ku a bira blanko dje gobièrnu di Trump, manera Columbia den New York.
Na komienso dje promé oudiensia na Boston, den yüli, Trump a akusá e wes Burroughs públikamente di ta un opositor notorio i ku Harvard ta “antisemita, anti kristian i anti norteamerikano”.
Di su parti, Harvard University a duna di konosé di a tuma medidanan pa garantisá ku e studiantenan i personal hudiu òf israelí lo no sinti nan mes ekskluí ni intimidá den e ‘campus’, bisando na mes momento ku e medidanan di gobièrnu federal ta “menasá” e libertat di ekspresá i libertat akadémiko.
