HOUSTON, AP.- Un pareha ku tabata biaha den nan trùk a muri hogá despues ku awa a lastra nan bai kuné. Asina outoridat a informá.
E pareha a yama e number di emergensia 911 pa pidi yudansa. Mas despues ora ku agentenan a haña e trùk, esaki tabata kompletamente bou di awa.
Norvell a identifiká e pareha komo Donald Rogers, di 65 aña i Rochelle Rogers di 58 aña. Nan tabata biba den un área rural den kondado na sùitwèst di Houston i tabata dirigiendo pa kas di un pariente serka di e área,
Ku e pareha su morto, e kantidat di mortonan ofisial kousá pa Harvey a subi na por lo ménos 23.
KADAVER DI 6 MIEMBRO DI FAMIA REKUPERA NA HOUSTON
E kadaver di seis miembro di famia na Houston a wòrdu rekuperá den un trùk ku a wòrdu lastra desde un brùg. Asina e hefe di polis di kondado Harris, Ed Gonzalez a indiká.
Gonzalez a bisa ku e famianan a regresá djárason na e sitio buskando e trùk i a avisá outoridat di esaki despues di a mira dos kadaver den e asiento dilanti.
Gonzalez a señalá ku a rekuperá kadaver di dos adulto den e asiento dilanti i a haña e kadavernan di kuater menor den e parti patras. El a bisa ku e trùk tabata di trabou i ku e sekshon patras tabata separá pa un kortina di heru.
Samuel Saldicar a bisa na agentenan ku e tabata den e trùk di su ruman i a manehá esaki pa reskatá su mayornan i famianan di su kas inundá, pero e vehíkulo a wòrdu lastra pa un koriente fuerte miéntras e tabata krusando brùg.
Saldivar a logra skapa via bentana pero sobra a keda pega den esaki. Entre e víktimanan tabatin su mayornan i kuater bisañetu, di entre 6 pa 16 aña.
Kostanan di Texas i Louisiana a haña segundo gòlpi di Harvey
Kisas ku ménos forsa, pero Harvey a réplika su paso devastador riba Tera ku mas áwaseru, inundashon di kas i kamindanan. Esaki a provoká ku polis i outoridat di gobièrnu a lucha pa reskatá personanan den awa.
E frontera entre Texas i Louisiana haña e pió parti di e segundo gòlpi di Harvey, ounke e biaha aki komo tormenta tropikal. E orkan a generá inundashonnan manera el a laga na Houston, su suburbionan i pueblonan na kosta. Den algun parti di e zona metropolitano di Houson, kaminda tin seis mion abitante, esaki a laga 127 centimeter di áwaseru i a kousa morto di por lo ménos 23 persona.
Pero miéntras Houston tabata hañando su promé rayonan di solo, algun zona na ost a lanta den kasnan kompletamente inundá.
Mucha chikitu a sobreviví Harvey teniendo na kadaver di su mama
Un mucha muhé di 3 aña a wòrdu haña temblando di friu i teniendo na kadaver di su mama na sùitost di Texas. Posiblemente el a sobreviví pa e esfuerso ku su mama a hasi pa mantené safe di e inundashonnan provoká pa Harvey, segun informashon di polis djárason.
Polis di Beaumont a identifiká e mama komo Colette Sulcer, di 41 aña i a bisa ku e mucha tabata hospitalisá pa hipotermia pero ku e tabata stabil. Na momentu ku ekiponan di reskate a hañ’é, e mucha muhé tabata riba lomba di su mama ta tene, segun indikashon di polis Haley Morrow.
