Shentily Zimmerman un hóben di 17 aña ta hopi aktivo riba tereno di kantamentu. Shentily ta kanta for di chikí i ya a partisipá 5 bia na festival di tumba hubenil i semper el a kai den e finalistanan. E tabata ganador apsoluto kanto pa Kòrsou pa nos muchanan, ganador apsoluto Bos di kunuku, tambe el a presentá na akademia di Danny Janga i den tur su Shownan, aktualmente ta kanta ku e grupo di Carslon Manuel den un grupo rítmiko kual ta Grik. Aña pasá desèmber el a graba un piesa di Pasku ku yama Unda papa Pasku ta, i e aña aki e ta trahando un videoclip di dje.
5 bia festival tumba hubenil
Shentily a konta nos ku e ta kanta for di chikí ku su tata i esaki a hala su mama su atenshon. E tin 17 aña i ta bayendo su último klas di VSBO na Skaih. El a konta Djasabra ku el a kuminsá kanta ku 11 aña partisipando na tumba hubenil. Tabata su promé aña i el a sali di kuater finalista. Despues el a sigui kanta 5 aña mas den festival di tumba hubenil. Den tur e añanan ei, el a bisa nos el a gusta e tumba Spil ku el a kanta na 2018. Tabata un tumba ku un mensahe masha bunita, e Spil a reflehá positivismo i tur loke ta ménos bon e ta mustra nos i hala nos atenshon ku kiko no ta bon.
Kanta for di chikí
Komo e ta gusta kanta e ta kere ku bista a habri riba dje i asina el a kuminsá haña invitashonnan pa bai kanta. Awor aki e ta den grupo Grik ku ta un grupo di músika kultural. Tambe el a yega di kanta den aguinaldo di Cariñitos. E ta den Choir ku ta un grupo grandi di koro. I tur esaki el a kuminsá for di chikitu huntu ku su tata. Su mama ta tende e ku su tata kanta i a bin riba e idea pa e bai Rumba Hubenil.
Awor aki ku su 17 aña Shentily no por subi tarifa pa Tumba Hubenil mas. El a bisa Djasabra ku e no ta kere fásilmente ku e lo pasa over pa tumba grandi. E no ta kere esaki pasobra e gusta mas kansionnan i músika suave. E ta gusta mas kanto pa Kòrsou kaminda si e ke partisipá kisas otro aña.
Nèrvioso
Teniendo na kuenta un hóben ku tin di para dilanti di un grupo grandi manera den Festival Center, kon e preparashon aki ta bai. Shentily a bisa nos ku e ta focus i pensa loke e ta bai hasi riba stage i e ta trein su mes mentalmente i hasi su shou. El a bisa ku den su promé aña e tabata nèrvioso pero ora el a kustumbrá i asina a bira ménos nèrvioso pasobra e sa ku e por e i a bai pe.
Gèmber ta bon pa garganta
Shentily ta kuida su stèm dor di bebe awa di gèmber i honing òf gor garganta ku lamunchi i honing. El a bisa ku gèmber ta masha bon pa garganta.
The Young Voices
Algun siman pasá Shentily huntu ku dos amiga mas ku el a konosé durante di festival di tumba Hubemil a organisá un show. Naemi Kirindongo i Tkaely Polonius ta e dos hóbennan ku a forma un tim ku Shentily i nan a duna show huntu ku diferente músika varia manera salsa, sòft, kosnan ku grandinan mas ta gusta tende. I tabata un show masha bon bishita i hopi reakshon. Kada un a bin ku sorpresa, den kaso di Shentily el a bai ku Tony Sherman, Tkaely a bai ku Maxwelll i Naemy a bai ku Furgel Wijngarden. Esaki ta nifiká ku Shentily a subi esenario ku Tony Sherman. Esaki tabata un eksperensia masha spesial pe kantando ku un artista grandi i un artista ku a logra hopi den bida. I nan tres a yama nan mes e grupo The Young Voices. Tambe ta intenshon pa e tres hóbennan aki sigui duna presentashon. Por ehèmpel na desèmber aki ku e video clip Unda Papa Pasku ta lo sòru pa un shou spesial pa e dianan ei. E video clip aki ta basta leu i falta algun shòt mas pa asina e por kaba kuné i pa desèmber e ta riba merkado.
Internashonal
Shentily a bisa ku e ke ta un artista i banda di dje e ke bira un masahista. Loke ta su karera di kantamentu e ke pone djòp aserka i sigui ku su karera di masashi tambe. Shentily ta kere ku e lo por bai internashonal tambe den kantamentu. E ke bende su mes pa mas wowo habri riba dje pa asina invitashonnan por sali pa e kanta.
Kansionnan ménos positivo
Mirando kansionnan ku ta subi traha pa nos hóbennan, Shentily a bisa Djasabra ku hopi di e kansionnan ei ta músika positivo i ku por inspirá otronan. Pero tin otronan ménos bon i no ta bon pa skucha pasobra nan no ta duna un bon pensamentu. Tambe ta haña ku kansion por tin influensia riba hóbennan su komportashon voral esnan ku ta kanta di violensia. I pa kolmo tin hóben ta tende e kantikanan ei tur dia i asina nan por tambe bai den violensia.
Pe hóben aki su skol ta importante pa e kaba. Sin skol bo no ta yega leu asina el a bisa nos. E ta bon di focus riba skol i banda di dje e ta trein kantamentu. Tambe e ta spera un dia di por guia hóbennan den kantamentu. Lo ta bon pa e demostrá un hóben loke el a hasi i pa e hóben ei tambe por hasi asta mihó kuné. Shentily ta haña su mes un ehèmpel pa nos hóbennan, pa nan kana den bon kaminda.
Bai semper pa e bon
Teniendo na kuenta ku skol ta kuminsá otro siman Shentily a bisa e hóbennan pa semper bai pa nan meta, keda di focus i semper hasi pa bon i bon lo bin pa bo.
