Child First Foundation:
WILLEMSTAD.- Lokual ku Child First Foundation ke bai logra ta pa hasi prizòn aksesibel pa un mucha por topa su tata. Yunan mester tin un relashon ku nan tata sin importá loke ku a pasa den pasado. Úniko ora ku mester kontrolá e situashon ta, si e tata ta abusá di e mucha. Pero, asta ora e tatanan ta den prizòn e yunan tin derecho di tin kontakto ku nan ta tata.
Den e kuadro aki direktor i kofundadó di Child First Foundation, Chris Peterson, a duna di konosé den e ‘podcast’ ‘3or ku Gino’ ku e fundashon ta bai lansa un proyekto pa un yu por topa ku su tata ku ta den prizòn. Na sèptèmber awor e fundashon ta haña asistensia tékniko for di Hulanda pa asina traha riba rapòrtnan pa hustifiká e loke ke logra i wak kon por organisá na Kòrsou tambe ku un yu, na un manera mas ameno pa mucha, por tin kontakto ku su tata den prizòn. Peterson ta pensa den un área apart ku ta muchu mas ameno i kaminda tata i yu por topa.
E proyekto ta den un fase preliminar ainda. E fundashon no a papia riba e idea aki ku outoridatnan kompetente manera e minister di Hustisia, maneho di prizòn, Voogdijraad, Reclassering, etc. “Nos ta konvensí i nos tin prueba a base di eksperensia propio ku muchanan ku ta’tin relashon ku nan tata, apesar ku e tata ta den prizòn, ta desaroyá muchu mas mihó. Miembro di direktiva di Child First Foundation, Ryan de Jongh, ta añadí bisando ku tin investigashon di hopi aña ku ta demostrá un diferensia den e manera ku mama i tata ta eduká un yu.
Esaki ta pon’é yega na e konklushon ku e yu mester di ámbos mayor den su bida. E ta bisa asta ku siensia a proba ku yunan ku lanta solamente serka nan tata, ta resultá mihó ora nan bira grandi, kompará ku si e yu lanta solamente serka e mama. “E kosnan aki ta probá kaba, pero ta ku hopi preshon a logra sierto kambio den leinan.”
E ta sigui bisa: “E pruebanan ta riba papel, ta usa mester usa nan. Pakiko mi tin ku diskutí komo tata pa mi por wak mi yu.” Peterson ta enfatisá mas aleu ku Child First Foundation no t’ei pa e tata, pero pa e yu.
“E yu tin un derechi universal rekonosé pa Nashonnan Uní i tratadonan internashonal. E tata mester t’ei pa su yu, pero nos enfoke ta riba e mucha.” Segun e presidente i kofundadó tin sierto pais na mundu kaba ku ta apliká loke Child First Foundation ta boga p’é.
“Bo tata, asta si e ta un kriminal, ta keda bo tata. Si e ta usa droga òf ta hòrta, e ta keda bo tata. No por skrap e echo ku e ta bo tata i e yu mester tin akseso na su tata.”
Aunke ku e ponensia aki, segun Peterson, no ta kuadra tampoko. E ta indiká ku tin hopi ehèmpel na mundu di mayornan ku semper a biba korekto pero nan yunan si a hasi kos robes i mayornan ku a hasi kos robes, pero nan yunan semper a komportá nan mes bon.
