….. Kana keiru den naturalesa por ta algu agradabel, pero ora ta papia di ‘hike’ ta referí na un aktividat di karakter diferente. HBike Outdoor Curaçao ku den luna di ougùstùs benidero ta kumpli 11 aniversario, a introdusí un dimenshon nobo aki na Kòrsou ora ku ta papia di moveshon den naturalesa: Bisti di tal manera ku ta protehá kurpa pa sumpiña i piedra skèrpi i sinti bo kómodo pa drenta área di naturalesa i move riba ritmo pa traha riba bo kondishon físiko.
Albert Le Grand i Edseline Streden por papia oranan largu riba e manera ku HBike Outdoor Curaçao ta eksplorá delaster un huki skondí di Kòrsou. Un área di 444 km2 ku ounke esaki ta relativamente chikí, tòg pa gran parti ta imakulata. Ta ‘hike’ ku miembro- i introdusidonan.
Albert a yega Kòrsou na edat di 5 aña, prosedente di Anguila. “Mi tin e previlegio di a lanta den Wishi/Marchena. “M’a lanta e siguiente dia mainta di a yega Kòrsou, sali for di kas i hisa kara mira un seru mi dilanti. “Na Anguila no tin seru”, e ta bisa i ta kòrda ku na e momento ei tur kos a kuminsá. El a kuminsá subi e serunan den e bario, despues tabata bai poko mas leu riba mountainbike pero manera e yega na un mondi, e ta pone baiskel un banda i bai eksplorá.
A yega e momento ku e ta haña su mes pará dilanti di mondinan será. Esei a trese kuné ku e tabata bai serka hendenan di bario i puntra kon pa yega na tòp di seru. Te awe esei ta e kaso, hopi komunikashon ku hendenan di barionan kaminda e ta krea ruta.
Dado momento a surgi un grupo selektivo pa motibu ku ‘hiking’ no tabata popular aki na Kòrsou. El a bin topa ku Alton La Cruz i Mariela Burk i e pregunta a surgi, di kon no hasi ‘hiking’ algu mas serio? Donald de Palm i Raymond Maria a djòin e grupo i ku esei e idea a haña mas forma i start, ounke ta algun aña despues a lanta HBike di forma ofisial ku inskripshon na Kámara di Komèrsio riba 5 di ougùstùs 2013.
E grupo di 5 amigu a mira ku e “famia”a krese, te ku den 2023 a registrá 70 miembro kendenan ta ‘hike’ dos biaha pa siman den oranan di atardi, pero tambe 1x pa luna tin un aktividat djadumingu pa 6’or di mainta durante kua ta kana riba tèmpo mas abou. Tantu e ‘hike’ den siman komo e aktividat di 6’or di mainta ta habrí tambe pa no-miembro.
Mas aktividat ta nifiká tambe mas ruta. HBike tin un komishon di mantenshon bou di guia di Luis Servanie, ademas di diferente miembro. Interesante ta ku kada bes ta surgi mas área. “Ami konstantemente ta pensa kon pa yega na sierto sitio kaminda ningun hende ta trafiká”, segun Albert ta trese dilanti.
Un ehèmpel ta e áreanan di zoutpan, tantu Pariba komo Pabou. Tur hende por sa ku nan tei, pero a kana rondó di nan i sigui bai mas leu?
Por ehèmpel, e área di Ararat di kua su retonan a surgi for di un aksidente riba Brùg Juliana. Estando riba e brùg a mira un área di naturalesa grandi pegá ku Tele-Curaçao i esei a bira un siguiente reto. Hopi trabou a tuma lugá n’e sitio pa saka kantidat grandísimo di sushi, pa por a krea un ruta nobo. Di mes manera a krea ruta na Fuik, área di Vaersenbaai, St. Joris, Domi, Seru Pretu, Fort Beekenburg, Seru Grandi, Hato, St. Jago, Bullenbaai, Klein Piscadera, Caracasbaai, Koraal Specht, Playa Canoa, Parasasa, Westpunt, Janthiel i hopi mas.
Sin duda e reto ta keda pa ‘hike’ den áreanan nobo. Pa esaki hopi biaha ta konfrontá ku terenonan grandi ku ta propiedat privá. Esaki no mester ta un opstákulo i e manera ta pa buska kontakto ku doñonan di tereno.
Na hopi okashon a sinta kombersá ku esakinan i e parti positivo ta ku vários ta duna lus bèrdè pa kana riba nan tereno. Tin ta kobra, otro no, pero importante ta ku nan ta habrí pa skucha.
Tin áreanan hopi será ku por mira riba ‘google’, sigur e área di Westpunt, ku ketu bai ta un reto grandi ofresiendo posibilidatnan pa ‘hike’.
Un dje metanan aktual ta pa krea un ruta di 8 pa 9 km, krusando den naturalesa for di Barber te na lanthùis Pannekoek.
E grupo di Bándabou
Ounke ku ta trata di un (1) organisashon, HBike tin tambe su sekshon di Bándabou ku ta na enkargo di Dulce Olbino
Ku tempu a bin realisá ku meskos ku t’e kaso Pariba, ku parti Pabou di Kòrsou tambe tin áreanan kaminda hende no ta pasa ni na pia. E miembro di direktiva Rob van Wageningen despues di a muda pa Bándabou, a tuma e enkargo pa atendé ku e rutanan na e parti ei di nos isla. Ku entrada di Dulce esaki a bira aún mas serio i e parti aki tambe a krese te ku nan tambe tin nan mes ‘hike’ riba tur djamars. Bon pa menshoná ku e área di Bándabou tin su retonan enorme, ku masha hopi posibilidat. E organisashon tin bista riba esaki pa drenta naturalesa den e diferente barionan i krea rutanan nobo.
Mantenshon di ruta
Por krea hopi ruta nobo, pero promé ku esei ta importante pa hasi mantenshon di rutanan aktual.
Dirigentenan di HBike ta mira for di un brel positivo ku a surgi vários grupo mas ku ta drenta naturalesa. Hopi ta hasié komo kaminata, pues kana trankil, sintá un kaminda kombersá, etc. Otronan tambe ta mira e parti deportivo, esta kana ku velosidat.
HBike ta esun ku, por lo general, ta krea rutanan nobo i ta mira komo algu bon ku otro gruponan tambe ta usa esakinan. E parti ménos positivo ta, k’e aspekto di mantenshon si ta keda solamente den man di HBike. Pues ta spera ku otro gruponan tambe ke duna un man pa yuda krea ruta nobo, pero importante tambe pa hasi trabou di limpiesa i mantenshon. Sigur despues di temporada di áwaseru ta surgi hopi trabou pa tene e rutanan habrí.
HBike ta asentuá ku e organisashon no tei pa hasi negoshi. Nan ta hopi di focus riba hende lokal, ku ke move pa nan kondishon físiko. Pero no por nenga ku mantenshon di ruta tin su kosto kuné, sigur ku kompra di material di bon kalidat pa por hasi e trabou di ‘clean up’ i despues pa deshasí di sushi.
Bin djòin!
Tur siudadano ku ke move pa kondishon, ta bon biní. Aktividatnan ta den siman despues di ora di trabou i djadumingu mainta 6’or. Ta konsehá eventual no-miembro interesá pa move ku e grupo den siman pagando 5 florin, di manera ku nan ta sinti i disfrutá kon pa ‘hike’. Na komienso di e siguiente aña tin oportunidat pa bira miembro.
Por sigui aktividatnan di HBike riba su página di Facebook: Hbike Outdoor Curaçao. Tambe por hasi kontakto via email: hbike.oc@gmail.com
Direktiva di HBike:
Presidente: Albert Le Grand
Vise-presidente: Nancy Jansen
Sekretario: Dulce Olbino-Andrea
Tesorero: Edseline Streden
Miembronan: Ashwin Behilia, Luis Servanie, Marilyn Adriana, Shahaira Fullinck, Siegfried Hazel
