WASHINGTON (AFP).- E hefe di CIA, John Ratcliffe, a biaha ayera pa Mòsku, segun prensa norteamerikano CSB i Axios, un movishon ku ni Washington ni Mòsku no a konfirmá te ku ayera tardi.
Te ku ayera tardi e motibu dje biahe no tabata konosí. Lo ta e promé bishita konosí di Ratcliffe na Rusia for di despues di a asumí e funshon den 2025.
Den oranan di atardi e wèpsait Flightradar a mustra ku un avion militar norteamerikano a lanta buelo na Letonia ku destino pa e aeropuerto moskovita Vnúkovo.
Segun e datonan dje wèpsait ku ta sigui buelonan, e avion inisialmente a bula djadumingu for di e base aéreo di Andrews, situá serka di Washington i usá pa buelo di funshonarionan, te yega na Riga ku ta e kapital di Letonia. E mesun avion e lanta buelo for di e kapital ruso djamars atardi.
Puntrá den konferensia di prensa diario, e bosero di Kremlin, Dmitri Peskv, a respondé di “no ta disponé dje informashon ei”.
Den último simannan tabatin vários spekulashon di posibel biahe pa Rusia di e emisarionan norteamerikano Steve Witkoff i Jaed Kushner. Pero Peskv a bisa di no tin programá ningun reunion na Kremlin huntu ku representantenan di gobièrnu norteamerikano.
